सावंतवाडीत कॅफे चालकास डस्टबिनच्या डब्याने मारहाण

सावंतवाडीत कॅफे चालकास
डस्टबिनच्या डब्याने मारहाण

दोघांविरोधात पोलिसांत गुन्हा दाखल

सकाळ वृत्तसेवा
सावंतवाडी, ता. ३१ ः मोटारीचा दरवाजा लागल्याच्या कारणावरून झालेल्या वादातून दोघांनी मिळून एका कॅफे चालकाला डस्टबिनच्या डब्याने मारहाण केल्याची घटना गुरुवारी (ता.३०) रात्री शहरात घडली. या प्रकरणी ओमकार गावकर आणि सोहेल मुजावर या दोघांविरोधात येथील पोलिस ठाण्यात गुन्हा दाखल केला आहे.
पोलिसांकडून मिळालेल्या माहितीनुसार, फिर्यादी मौहसीन शब्बीर तांबोळी (रा. कोलगाव दरवाजा, वैश्यवाडा, सावंतवाडी) हे गुरुवारी रात्री सुमारे ११ ते ११.३० च्या दरम्यान मँगो हॉटेलसमोरील त्यांच्या कॅफेसमोर उभे होते. याचवेळी संशयित ओमकार गावकर आणि सोहेल मुजावर हे तेथे आले. ते मोटारीचा दरवाजा उघडत असताना तो दरवाजा तांबोळी यांना लागला. या घटनेबाबत तांबोळी यांनी दोघांना विचारणा केली असता, वाद निर्माण झाला. हा वाद क्षणातच हाणामारीत बदलला. यावेळी त्या दोघांनी तांबोळी यांच्या डोक्यावर डस्टबिनच्या डबा मारला तसेच लाथाबुक्क्यांनी मारून जखमी केले व शिवीगाळही केली. त्यानंतर काहींनी जखमी तांबोळी यांना उपजिल्हा रुग्णालयात उपचारासाठी दाखल करण्यात आले. त्यांनी सावंतवाडी पोलिस ठाण्यात जाऊन फिर्याद दिली असून, पोलिसांनी दोघांविरुद्ध गुन्हा दाखल केला आहे. या प्रकरणाचा तपास पोलीस हवालदार महेश जाधव करीत आहेत.