डेगवे-तांबोळी फॉरेस्ट रस्त्याची दैना

01774

डेगवे-तांबोळी फॉरेस्ट रस्त्याची दैना

प्रवाशी त्रस्त; जीव मुठीत धरून प्रवास

सकाळ वृत्तसेवा
बांदा, ता. १ ः डेगवे-तांबोळी मार्गावर वन खात्याच्या मालकीतील रस्त्याची दुरवस्था झाली असून, या रस्त्यावरून प्रवास करणे नागरिकांसाठी धोकादायक ठरत आहे. अवघ्या २८० मीटर अंतराच्या या फॉरेस्ट रस्त्यावर मोठमोठे खड्डे पडल्याने तांबोळी, असनिये, घारपी, फुकेरी, झोळंबे, भालावल, कोनशी, नांगरतास, दाभील या गावांतील विद्यार्थ्यांसह ग्रामस्थांना अक्षरशः जीव मुठीत धरून प्रवास करावा लागत आहे.
हा रस्ता विद्यार्थ्यांसाठी आणि ग्रामस्थांसाठी सर्वांत जवळचा व सोयीस्कर मार्ग असूनही त्याकडे संबंधित विभागाचे दुर्लक्ष होत असल्याने ग्रामस्थांतून संताप व्यक्त होत आहे. आमदार दीपक केसरकर यांच्या सूचनेवरून काही दिवसांपूर्वी या रस्त्यावर थोडीशी मलमपट्टी केली होती. मात्र, ती तात्पुरती ठरली. सध्या रस्त्याची अवस्था पूर्वीपेक्षाही बिकट झाली आहे.
दररोज या रस्त्यावरून दुचाकी व चारचाकी वाहने घसरून लहान-मोठे अपघात घडत आहेत. तरीदेखील प्रशासनाकडून कोणतीही ठोस उपाययोजना होताना दिसत नाही. ‘कुणाचा तरी जीव गेला तरच हालचाल होणार का?’ असा संतप्त प्रश्‍न ग्रामस्थ विचारत आहेत. जिल्हा परिषद व पंचायत समिती निवडणुका तोंडावर असताना, या गंभीर प्रश्नाकडे संबंधित लोकप्रतिनिधी व अधिकाऱ्यांनी तातडीने लक्ष देणे आवश्यक आहे. अन्यथा ग्रामस्थांचा रोष व्यक्त होण्याची शक्यता नाकारता येत नाही. डेगवे-तांबोळी फॉरेस्ट रस्त्यावरील ‘खड्ड्यांचा वनवास’ अखेर कधी संपणार, हा प्रश्न आता ग्रामस्थांच्या ओठांवर आहे.