केळी-सुपारीच्या सोपातून साकारला ‘कालिया मर्दन’

01787

केळी-सुपारीच्या सोपातून
साकारला ‘कालिया मर्दन’

निरवडे-कोनापालचा देखावा लक्षवेधी

सकाळ वृत्तसेवा
सावंतवाडी, ता. १ : निरवडे-कोनापाल येथील श्री देव रवळनाथ मंदिर येथे आयोजित अखंड हरिनाम सप्ताहादरम्यान आनंद मेस्त्री, प्रशांत मेस्त्री आणि युवराज मेस्त्री या स्थानिक कलाकारांनी साकारलेला ‘कालिया मर्दन’ देखावा भाविकांचे लक्ष वेधून घेत आहे. हा देखावा केळीच्या आणि सुपारीच्या सोपासारख्या नैसर्गिक वस्तूंपासून अत्यंत कल्पकतेने साकारला आहे.
मेस्त्री बंधूंनी आपल्या अंगभूत कलेचा वापर करत श्रीकृष्णाच्या ‘कालिया मर्दन’ या लीला प्रसंगाला मूर्तरूप दिले आहे. ​देखाव्यात केळीच्या सोपाचा उपयोग प्रामुख्याने केला आहे. ​सुपारीच्या सोपाचा वापर करून त्याला अधिक सौंदर्य दिले आहे. ​नैसर्गिकरित्या उपलब्ध असणाऱ्या या वस्तूंचा वापर करून, परिश्रमपूर्वक व कौशल्याने त्यांनी श्रीकृष्णाचे कालिया नागावर नृत्य करण्याचा प्रसंग जिवंत केला आहे. ​या कलाकारांच्या सृजनशीलतेला भाविक मोठ्या प्रमाणावर दाद देत आहेत. मेस्त्री बंधूंनी दाखविलेली कल्पकता आणि कलेतील नैपुण्य यामुळे धार्मिक वातावरणात भर पडली आहे. हरिनाम सप्ताहासाठी आलेल्या सर्व भाविकांसाठी हा देखावा एक विशेष आकर्षण ठरला आहे. ​या कलाकृतीमुळे सप्ताहाची शोभा द्विगुणित झाली असून, या तिन्ही कलाकारांचे मंदिर व्यवस्थापन आणि येथील ग्रामस्थांकडून विशेष अभिनंदन होत आहे.