नारूर महालक्ष्मीचा आज वार्षिक जत्रोत्सव

नारूर महालक्ष्मीचा
आज वार्षिक जत्रोत्सव
सकाळ वृत्तसेवा
कुडाळ, ता. ४ः तालुक्यातील नारूर येथील ग्रामदैवत श्री देवी महालक्ष्मीचा वार्षिक जत्रोत्सव उद्या (ता. ५) सुरू होत असून तीन दिवसांच्या धार्मिक आणि सांस्कृतिक कार्यक्रमांनी तो दिमाखात साजरा होणार आहे.
या जत्रोत्सवाची सुरुवात उद्या पहाटे ६ वाजता सामुदायिक प्रार्थना आणि लघुरुद्र अभिषेकाने होईल. सकाळी ९ वाजता सालंकृत महापूजा, ओटया भरणे, नवस बोलणे-फेडणे या विधींना प्रारंभ होईल. दुपारी साडे बारा वाजता महानैवेद्य, महाआरती आणि महाप्रसादाचा कार्यक्रम होणार आहे. सायंकाळी ५ वाजता उपदैवतांना दीपदान, तर ६ वाजता त्रिपुरारी वाती पेटवणे, पुराण वाचन आणि आरती होईल. रात्री ११ वाजता श्री देवी महालक्ष्मीची पालखी सोहळा पार पडेल. मध्यरात्री १२ वाजता वालावलकर दशावतार नाट्य मंडळ आपला पारंपरिक दशावतारी नाट्यप्रयोग सादर करणार आहे. गुरुवारी (ता.६) सकाळी ८ वाजल्यापासून अभिषेक, कुंकुमार्जन व महापूजा, दुपारी १ वाजता आरती, तर दुपारी ३ वाजता पारंपरिक गोपाळकाला होईल. सायंकाळी देवतळीस्थानासाठी पालखी रवाना होईल व उपदैवतांना भेट देण्याचा सोहळा पार पडेल. रात्री १० वाजता लळीत कीर्तन सादर होईल. शुक्रवारी (ता.७) सकाळी ११ वाजता महापूजा, दुपारी १२.३० वाजता महानैवेद्य आणि महाप्रसादानंतर सायंकाळी ४ वाजता या भव्य सोहळ्याची सांगता करण्यात येईल. या जत्रोत्सवाला भाविकांनी उपस्थित राहून श्री देवी महालक्ष्मीच्या दर्शनाचा लाभ घ्यावा, असे आवाहन देवस्थान स्थानिक सल्लागार उपसमितीचे अध्यक्ष दीपक नारकर, चार बारा गावकर मंडळी व समस्त नारूर ग्रामस्थांनी केले आहे.