लांजा-इच्छुकांची भाऊगर्दी, नेतृत्वाची डोकेदुखी

इच्छुकांची भाऊगर्दी,
नेतृत्वाची डोकेदुखी
लांजा नगरपंचायत; शिंदे शिवसेनेकडून मुलाखती
सकाळ वृत्तसेवा
लांजा, ता. १४ः येथील नगरपंचायतीच्या निवडणुकीसाठी शिंदे शिवसेनेकडून इच्छुकांच्या मुलाखती नुकत्याच पार पडल्या आहेत. त्यामध्ये नगरसेवकपदाच्या एका जागेसाठी ९ ते १० नावे आल्यामुळे पक्षनेतृत्वाची डोकेदुखी वाढली आहे; मात्र उमेदवारांची निवड वरिष्ठ पातळीवर होणार असल्याने इच्छुकांमध्ये संभ्रम वाढला आहे.
लांजा नगरपंचायत निवडणुकीची धामधूम सुरू झाली आहे. १७ प्रभागांसह नगराध्यक्षपदासाठी इच्छुकांच्या मुलाखती शिवसेना शिंदे गटाच्यावतीने नुकत्याच पार पाडल्या. नगराध्यक्षपदासाठी सहा तर प्रत्येक प्रभागानुसार नऊ ते दहा इच्छुक उमेदवारांनी मुलाखती दिल्या आहेत. विधानसभा निवडणुकीनंतर शिंदे शिवसेनेचे आमदार किरण उर्फ भैय्या सामंत यांनी लाजा-राजापूर विधानसभा मतदार संघात तळागाळात पक्ष पोचवण्यावर भर दिला होता. त्यामुळे पक्षाची ताकदही वाढलेली आहे.
गेल्या वर्षभरात अन्य पक्षातील अनेकांनी शिंदे शिवसेनेत प्रवेश केला आहे. या प्रवेशामागेही स्थानिक स्वराज्य संस्थांच्या निवडणुकीत संधी मिळेल, अशी सुप्त इच्छा आहेच. त्याचा प्रत्यय नुकत्याच झालेल्या लांजा नगरपंचायतीच्या निवडणुकीसाठीच्या मुलाखतीवेळी दिसून आला आहे. प्रत्येक जागेसाठी इच्छुकांची संख्या अधिक असल्याचे दिसत आहे. अनेकांनी मोर्चेबांधणी सुरू केली असल्याची चर्चाही रंगलेली आहे; मात्र उमेदवारांची निश्चिती वरिष्ठ पातळीवरून होणार असल्याचे आमदार किरण सामंत यांनी सांगितल्यामुळे इच्छुकांची धाकधूक वाढली आहे.