आंगणेवाडी मंदिरात ओट्यांचा विधी बंद

आंगणेवाडी मंदिरात
ओट्यांचा विधी बंद
मसुरे ः प्रति पंढरपूर म्हणून ओळखल्या जाणाऱ्या आंगणेवाडी येथील श्री देवी भराडी मंदिर येथे देव दिवाळीपासून जत्रोत्सवाच्या दिवसापर्यंत भाविकांच्या ओट्या भरण्याचा विधी प्रतिवर्षीप्रमाणे बंद ठेवला आहे. त्यामुळे या कालावधीमध्ये भाविकांच्या ओट्या देवालयात भरल्या जाणार नाहीत. भाविकांना देवीचे दर्शन नियमित वेळेनुसार मिळेल. वार्षिक जत्रोत्सवाची तारीख अद्याप निश्चित झाली नसून सोशल मीडियावर जत्रोत्सव तारखेबाबत पसरविल्या जाणाऱ्या अफवांवर कोणीही विश्वास ठेवू नये. तारीख निश्चित झाल्यानंतर अधिकृतरित्या आंगणे कुटुंबीयांतर्फे कळविण्यात येईल. भाविकांनी सहकार्य करण्याचे आवाहन आंगणे कुटुंबीयांनी केले आहे.
...................
चर्मकार समाजाचा
आज स्नेहमेळावा
वेंगुर्ले ः सिंधुदुर्ग जिल्हा चर्मकार समाज उन्नती मंडळ शाखा वेंगुर्लेचा विद्यार्थी गुणगौरव व समाज स्नेहमेळावा उद्या (ता. २३) सकाळी दहाला आयोजित केला आहे. येथील साई डिलक्स सभागृहात तालुकाध्यक्ष सहदेव शिरोडकर यांच्या अध्यक्षतेखाली व जिल्हाध्यक्ष सुजित जाधव यांच्या प्रमुख उपस्थितीत हा मेळावा होईल. उद्‍घाटक म्हणून मालवण पंचायत समिती गटविकास अधिकारी श्याम चव्हाण, निवृत्त संघटना कुडाळचे अध्यक्ष तथा शासकीय कर्मचारी पतसंस्थेचे संचालक उदय शिरोडकर व एस. टी. को-ऑप. बँकेचे निवृत्त शाखाधिकारी प्रवीण म्हापणकर, माजी जिल्हाध्यक्ष अ‍ॅड. अनिल निरवडेकर, निवृत्त उपमुख्य कार्यकारी अधिकारी विजय चव्हाण उपस्थित राहणार आहेत. महेश चव्हाण, गुरुप्रसाद चव्हाण यांनी ही माहिती दिली.