ओणी येथे आजपासून गांधी विचार व्याख्यानमाला

ओणी येथे आजपासून
गांधीविचार व्याख्यानमाला
कांडर, मेणसे, नदाफ हे मांडणार विचार
सकाळ वृत्तसेवा
राजापूर, ता. ७ः ओणी पंचक्रोशी शिक्षण मंडळ, ओणी संचलित नूतन विद्यामंदिर आणि कनिष्ठ महाविद्यालय आयोजित कोकण मराठी साहित्य परिषद शाखा राजापूर पुरस्कृत ‘गांधीतीर्थ स्वच्छ शाळा राज्यस्तरीय प्रतियोगिता अभियानां’तर्गत गांधीविचार व्याख्यानमालेचे आयोजन केले आहे. ओणी येथे उद्यापासून (ता. ८) सुरू होणाऱ्या या व्याख्यानमालेत विविध विषयांवर विचार मांडण्यात येणार आहेत.
कणकवली येथील प्रसिद्ध कवी अजय कांडर यांचे उद्या ‘अजूनही जिवंत आहे गांधी’ या विषयावर, मंगळवारी (९) कोल्हापूर येथील व्याख्याते पी. डी. पाटील यांचे ‘गांधी का मरत नाहीत?’, बुधवारी (१०) राष्ट्र सेवादलाचे महामंत्री बाबासाहेब नदाफ यांचे ‘मजबुती का नाम गांधी’, गुरुवारी (११) बेळगाव येथील व्याख्याते डॉ. आनंद मेणसे यांचे ‘गांधी आणि भारताचा स्वातंत्र्य लढा’ या विषयांवर व्याख्यान होणार आहे. संस्थाध्यक्ष अ‍ॅड. वासुदेव तुळसणकर यांच्या अध्यक्षतेखाली होणाऱ्या या व्याख्यानांना डॉ. महेंद्र मोहन, डॉ. शैलेश शिंदे-देसाई, अ‍ॅड. एकनाथ मोंडे, सूर्यकांत सुतार आदी उपस्थित राहणार आहेत. गुरुवर्य शहाजी भाऊराव खानविलकर सभागृहात सकाळी साडेदहा वाजता होणाऱ्या या व्याख्यानांना सर्वांनी उपस्थित राहावे, असे आवाहन कार्यवाह अ‍ॅड. गुरुदत्त खानविलकर, शाळा व्यवस्थापन समिती अध्यक्ष विजयकुमार वागळे, मुख्याध्यापक विनोद मिरगुले, मुख्याध्यापक साक्षी शिंदे यांनी केले आहे.