प्रावीण्य प्राप्त दिव्यांग विद्यार्थ्यांचा सन्मान

- rat११p६.jpg-
P२५O०९९१८
रत्नागिरी ः येथे आयोजित कार्यक्रमात प्रावीण्यप्राप्त विद्यार्थ्यांचा सन्मान करताना मुख्य कार्यकारी वैदेही रानडे.
---
प्रावीण्यप्राप्त दिव्यांग विद्यार्थ्यांचा सन्मान
दिव्यांग सप्ताहाचा समारोप; शासकीय योजनांवर मार्गदर्शन
सकाळ वृत्तसेवा
रत्नागिरी, ता. ११ ः जिल्हा परिषदेच्या जिल्हा दिव्यांग सक्षमीकरण कार्यालयाकडून जागतिक दिव्यांगदिनानिमित्त आयोजित दिव्यांग सप्ताहाचा समारोप नुकताच झाला. या प्रसंगी प्रावीण्यप्राप्त दिव्यांग विद्यार्थ्यांचा पारितोषिके देऊन सन्मान करण्यात आला.
रत्नागिरीत काल (ता. १०) झालेल्या या कार्यक्रमाचे उद्‍घाटन जिल्हा परिषद मुख्य कार्यकारी अधिकारी वैदेही रानडे यांच्या हस्ते झाले. जिल्ह्यातील दिव्यांगांच्या कार्यशाळा तसेच दिव्यांगांसाठी कार्यरत स्वयंसेवी संस्था यांच्या सहकार्याने हा कार्यक्रम घेण्यात आला. जिल्ह्यातील विशेष शाळेमधील विद्यार्थ्यांनी सांस्कृतिक कार्यक्रम सादर केले. दिव्यांग विद्यार्थ्यांनी तयार केलेल्या विविध वस्तूंचे स्टॉल लावण्यात आले होते. प्रावीण्यप्राप्त दिव्यांग विद्यार्थ्यांना पारितोषिके मान्यवरांच्या हस्ते देण्यात आली. दिव्यांगांसाठी चॅटबॉटवरील सोयीसुविधा, दिव्यांग व्यक्ती हक्क अधिनियम २०१६चा कायदा, दिव्यांगत्व जन्माला येऊ नये यावर उपाययोजना, शासकीय योजना, दिव्यांग वित्तीय महामंडळ यांच्याकडील योजना व जिल्हा दिव्यांग पुनर्वसन केंद्र याबाबत माहितीपर व्याख्यान आयोजित केले होते. या कार्यक्रमाकरिता जिल्हा दिव्यांग सक्षमीकरण अधिकारी व त्यांचे अधिनस्त सर्व कर्मचारी, जिल्हा परिषदेतील सर्व खाते प्रमुख उपस्थित होते. विशेष शाळेतील विद्यार्थी, पालक, शिक्षक, तालुकास्तरावरील विशेष शिक्षक, जिल्ह्यातील स्वयंसेवी संस्थांचे अध्यक्ष तसेच जिल्ह्यातील इतर दिव्यांग व्यक्ती उपस्थित होते.