गणित अध्यापक मंडळातर्फे रविवारी विद्यार्थी गुणगौरव

गणित अध्यापक मंडळातर्फे
रविवारी विद्यार्थी गुणगौरव
सकाळ वृत्तसेवा
मालवण, ता. ११ : महाराष्ट्र राज्य गणित अध्यापक मंडळाशी संलग्न असलेल्या सिंधुदुर्ग जिल्हा गणित अध्यापक मंडळातर्फे २०२४-२५ मधील गणित प्रज्ञा स्पर्धेत गुणवत्ता प्राप्त केलेल्या विद्यार्थ्यांचा सत्कार सोहळा रविवारी (ता. १४) सकाळी १० वाजता बॅ. नाथ पै सभागृह, कुडाळ येथे होणार आहे. यावर्षी पाचतील ३२ विद्यार्थी, आठवीतील २२ आणि दहावी परीक्षेत जिल्ह्यात प्रथम तीन क्रमांक प्राप्त केलेले विद्यार्थी अशा एकूण ५७ गुणवंत विद्यार्थ्यांचा सत्कार करण्यात येणार आहे. गुणवंत विद्यार्थ्यांना मान्यवरांच्या हस्ते प्रमाणपत्र आणि ट्रॉफी देऊन सन्मानित केले जाईल. मंडळाचे जिल्हाध्यक्ष प्रसाद कुबल यांनी गणित विषयातील प्रावीण्य, कौशल्य आणि तार्किक विचारसरणी वाढीस लागावी तसेच विद्यार्थ्यांना उच्च शिक्षणासाठी प्रोत्साहन मिळावे, हा या सत्कार सोहळ्याचा प्रमुख उद्देश असल्याचे स्पष्ट केले. विद्यार्थ्यांचा उत्साह आणि पालक व शिक्षकवर्गाचा सहभाग कौतुकास्पद असल्याचेही त्यांनी सांगितले. या कार्यक्रमास गणित क्षेत्रातील अनेक मान्यवर उपस्थित राहणार आहेत. सर्व गुणवंत विद्यार्थ्यांनी व त्यांच्या पालकांनी मोठ्या संख्येने उपस्थित राहावे, असे आवाहन जिल्हाध्यक्ष कुबल यांनी केले आहे.