पेढांबेत महिलांना व्यावसायिक प्रशिक्षण कार्यशाळा

पेढांबेत महिलांना व्यावसायिक प्रशिक्षण
सकाळ वृत्तसेवा
चिपळूण, ता. १३ ः महिलांच्या हाताला काम मिळावे, त्यांना रोजगाराची साधने उपलब्ध व्हावीत या हेतूने ग्रामपंचायत पेढांबे आणि लोटे येथील एक्सेल कंपनीच्या स्वामी विवेकानंद रिसर्च सेंटरच्यावतीने पेढांबे येथे महिलांना व्यावसायिक प्रशिक्षण देण्यात आले.
मुख्यमंत्री समृद्ध पंचायतराज अभियानांतर्गत ग्रामपंचायत पेढांबेतर्फे विविध उपक्रम राबवण्यात येत आहेत. प्लास्टिकचा वापर टाळण्यासाठी गावात इकोफ्रेंडली पत्रावळीचा वापर सार्वजनिक कार्यक्रमात केला जात आहे. ग्रामस्थांनीदेखील या उपक्रमाला मोठा प्रतिसाद मिळाला. एक्सेल कंपनीच्या स्वामी विवेकानंद रिसर्च सेंटरतर्फे गेल्या काही वर्षांपासून शिक्षण, आरोग्य, कृषी, विज्ञान, पर्यावरण, महिला सक्षमीकरण आदी विषयांवर कामे केली जात आहेत. त्यांनी चिपळूण, खेड तालुक्यात शेकडो उपक्रम घेतले. या पार्श्वभूमीवर पेढांबे येथील महिलांना ९ व १० डिसेंबरला व्यवसाय प्रशिक्षण देण्यात आले. टाकाऊपासून टिकाऊकरिता जुन्या साड्या व कापडापासून कापडी पिशव्या बनवणे व धूपकांडी बनवण्याचे प्रशिक्षण देण्यात आले. यासाठी स्वामी विवेकानंद रिसर्च सेंटरचे विवेक शेंडे, स्वप्नील महाडिक यांचे मोलाचे सहकार्य लाभले. या वेळी पेढांबेच्या सरपंच विजया पेढांबकर, उपसरपंच विलास तांदळे, सदस्य राजेंद्र कदम, श्रद्धा शिंदे, प्रथमेश शिंदे, ग्रामपंचायत अधिकारी अनिता पाटील व महिला उपस्थित होते.