आजगाव येथे गुरुवारी प्रेरणा साहित्य संमेलन

swt1610.jpg
O11046
प्रवीण देशमुख
swt1611.jpg
11047
भालचंद्र जोशी

आजगाव येथे गुरुवारी प्रेरणा साहित्य संमेलन
खटखटे वाचनालयात आयोजनः प्रवीण देशमुख संमेलनाध्यक्ष, भालचंद्र जोशी स्वागताध्यक्ष
सकाळ वृत्तसेवा
सावंतवाडी, ता. १६ ः आजगाव येथील साहित्य प्रेरणा कट्ट्याच्या सलग ६२ व्या मासिक कार्यक्रमाचे औचित्य साधून गुरुवारी (ता.२५) शिरोडा येथील रघुनाथ गणेश खटखटे ग्रंथालयाच्या सहयोगाने एक दिवसीय प्रेरणा साहित्य संमेलनाचे आयोजन केले आहे.
शिरोडा (सिंधुदुर्ग) येथील खटखटे ग्रंथालयात होणाऱ्या या संमेलनाच्या अध्यक्षपदी कल्याण येथील नामवंत साहित्यिक तथा साहित्यिक चळवळीतील ज्येष्ठ कार्यकर्ते प्रवीण देशमुख यांची निवड करण्यात आली आहे. झोळंबे, दोडामार्ग येथील पुस्तकप्रेमी भालचंद्र जोशी हे या संमेलनाचे स्वागताध्यक्ष आहेत.
सकाळी १० वाजता संमेलनाध्यक्ष व स्वागताध्यक्ष व अन्य मान्यवरांच्या उपस्थितीत संमेलनाचे उद्घाटन होईल. दुपारी ११.१५ वाजता ‘साहित्य संस्थांचे समाजस्वास्थ्यात योगदान’ या विषयावर परिसंवाद होईल. यात अजित राऊळ (आनंदयात्री, वेंगुर्ला), मंगेश मसके (कोकण मराठी साहित्य परिषद, सिंधुदुर्ग) व प्राचार्य गजानन मांद्रेकर (साहित्य संगम,मांद्रे,गोवा) हे भाग घेतील. दुपारी १२.३० वाजता ‘सुप्रसिद्ध साहित्यिक (कै.) कुमुद रेगे स्मृती वाचन साधना’ या वाचनवृद्धी उपक्रमाचा सुप्रसिद्ध कवी अनंत वैद्य व या उपक्रमाचे पुरस्कर्ते प्रसाद रेगे यांच्या उपस्थितीत उद्घाटन होईल. संमेलनाच्या भोजनोत्तर पहिल्या सत्रात दुपारी २ वाजता देवगड येथील सुप्रसिद्ध कवयित्री अपर्णा परांजपे प्रभू यांच्या अध्यक्षतेखाली स्थानिक तसेच निमंत्रित कवींचे कविसंमेलन होईल. त्यानंतर दुपारी ३.३० वाजता सुप्रसिद्ध साहित्यिक (कै.) रवींद्र पिंगे व नामवंत कथालेखक (कै.) शंकर पाटील यांच्या जन्मशताब्दीचे औचित्य साधून ‘स्मरण रवि -शंकराचे…’ हा कार्यक्रम होईल. या कार्यक्रमात विनय सौदागर व प्रा. नीलम कांबळे अनुक्रमे (कै.) रवींद्र पिंगे व (कै.) शंकर पाटील यांच्या जीवनचरित्रावर बोलतील. प्रा. मानसी शेट मांद्रेकर या (कै.) पिंगे यांच्या एका सुंदर लेखाचे अभिवाचन करतील तर रवींद्र पणशीकर हे (कै.) पाटील यांची एक कथा सादर करतील. साहित्य प्रेरणा कट्टा व खटखटे ग्रंथालयाच्या संयुक्त विद्यमाने सुरू असलेल्या शिष्यवृत्ती परीक्षा वर्गाविषयी ग्रंथालयाचे कार्यवाह सचिन गावडे निवेदन करतील. यावेळी शिष्यवृत्ती वर्गाच्या विद्यार्थ्यांचा मान्यवरांच्या हस्ते गौरवही करण्यात येईल. सायंकाळी ४.३० वाजता संमेलनाध्यक्ष श्री. देशमुख यांच्या भाषणाने संमेलनाचा समारोप होईल. संपूर्ण संमेलनाचे सूत्रसंचालन डॉ. श्रीराम दीक्षित हे करतील. संमेलनाच्या प्रवेशद्वारास (कै.) रवींद्र पिंगे प्रवेशद्वार,तर सभागृहास (कै.) वि. स. तथा भाऊसाहेब खांडेकर सभागृह नाव देण्यात येणार आहे.