विजेचा खांब तुटून दोन कामगार जखमी

कीटकनाशक प्यायलेल्या
तरुणाचा मृत्यू
रत्नागिरी : अज्ञात कारणातून कीटकनाशक प्यायलेल्या तरुणाचा उपचारांदरम्यान १८ डिसेंबर रोजी जिल्हा शासकीय रुग्णालयात मृत्यू झाला. दीपक बाबू माने (वय ३०, रा. पटवर्धनवाडी उद्यमनगर, रत्नागिरी) असे त्या तरुणाचे नाव आहे. दीपक माने याने १० डिसेंबरला अज्ञात कारणातून राहत्या घरी कीटकनाशक प्यायले होते. त्यानंतर त्यांना अस्वस्थ वाटू लागल्यावर नातेवाईकांनी त्याला जिल्हा शासकीय रुग्णालयात दाखल केले. त्यानंतर दीपकला अधिक उपचारासाठी कोल्हापूर येथील रुग्णालयात दाखल करण्यात आले होते. १७ डिसेंबरला दीपकला पुन्हा जिल्हा शासकीय रुग्णालयात आणण्यात आले होते. मात्र उपचारादरम्यान गुरुवारी दुपारी दीपकचा मृत्यू झाला. याबाबत शहर पोलिस ठाण्यात आकस्मिक मृत्यूची नोंद करण्यात आली आहे.

विजेचा खांब तुटून
दोन कामगार जखमी
रत्नागिरी ः शहरानजीकच्या मिरजोळे हनुमाननगर येथे सिमेंटचा विजेचा खांब अचानक तुटल्याने त्या खांबावर काम करणारे दोन कामगार पडून जखमी झाले. ही दुर्घटना गुरुवारी (ता. १८) दुपारी घडली. साधन बुद्धिब चौधरी (वय २४) व फुलचंद सुखदेव चौधरी (२३, रा. मिरजोळे, रत्नागिरी) अशी जखमी कामगारांची नावे आहेत. त्यांच्यावर जिल्हा शासकीय रुग्णालयात उपचार सुरू आहेत. साधन आणि फुलचंद हे दोघेही गुरुवारी दुपारी मिरजोळे-हनुमाननगर येथे ३३ केव्ही वाहिनीचे काम करण्यासाठी सिमेंटच्या खांबावर चढले होते. हे काम करत असताना सिमेंटचा खांब तुटल्याने दोघेही खाली पडून जखमी झाले.