कोकणातील निसर्गसौंदर्याचे कोल्हापूर येथे चित्रप्रदर्शन

13178

कोकणातील निसर्गसौंदर्याचे
कोल्हापूर येथे चित्रप्रदर्शन
कलाकार मेस्त्रींची कल्पकता ः शाहू स्मारकात २७ पर्यत आयोजन
सकाळ वृत्तसेवा
म्हापण, ता. २४ ः कोल्हापूर येथील शाहू स्मारक कलादालनामध्ये सिंधुदुर्गातील युवा कलाकार राम मेस्त्री यांच्या चित्रांचे भव्य प्रदर्शन भरविण्यात आले आहे. हे प्रदर्शन शनिवार (ता.२७) पर्यंत सर्व रसिकांसाठी खुले आहे. या प्रदर्शनात मेस्त्री यांनी निसर्गाच्या विविध रूपांचे चित्रण केले असून त्यांच्या कलाकृतींमधून कोकणातील निसर्गसौंदर्य प्रभावीपणे प्रतिबिंबित होते.
श्री. मेस्त्री हे म्हापण येथील पाट हायस्कूलचे माजी विद्यार्थी आहेत. त्यांनी कोल्हापूर येथील दळवीज आर्ट कॉलेजमधून कला क्षेत्रातील उच्च शिक्षण घेतले. कलाशिक्षक संदीप साळसकर यांच्या मार्गदर्शनाखाली त्यांनी जिल्हास्तरावर अनेक बक्षिसे पटकावली आहेत. निसर्ग हा नेहमीच त्यांच्या प्रेरणेचा प्राथमिक स्रोत राहिला आहे. त्यांची कला केवळ दृश्य वास्तव न दर्शवता अंतर्गत भावना, विचार आणि वैयक्तिक अनुभवांचे प्रतिबिंब सादर करते. मेस्त्री यांच्या कलाप्रवासाची दखल घेत प्रफुल्ला डहाणूकर आर्ट फाउंडेशन, मुंबई यांचा मानाचा पुरस्कार तसेच ‘विश्वरंग’ तिसरे राष्ट्रीय चित्र प्रदर्शन पुरस्कार त्यांना प्राप्त झाले आहेत.
-----------
कोट
निसर्गाच्या सानिध्यात काम करताना अनेक दृश्य प्रतिमा अनुभवायला मिळतात. निसर्गात घडणाऱ्या सूक्ष्म हालचाली वेगळीच अनुभूती देतात. निरीक्षण, भावना आणि निसर्गाशी असलेले नाते यांचा संगम म्हणजे माझा कलात्मक प्रवास होय.
- राम मेस्त्री