वैधमापनशास्त्र नियमांचे उल्लंघन केल्यास कारवाई

वैधमापनशास्त्र नियमांचे
उल्लंघन केल्यास कारवाई

काकडे ः सिंधुदुर्गनगरीत मार्गदर्शन

सकाळ वृत्तसेवा
सिंधुदुर्गनगरी, ता. २७ ः ‘वैधमापनशास्त्र नियमांचे पालन करणे प्रत्येक आस्थापनेचे कर्तव्य आहे. ग्राहकांचा विश्वास मिळवण्यासाठी अचूक व पारदर्शक माहिती देणे आवश्यक आहे. नियमांचे उल्लंघन करणाऱ्या आस्थापनांवर कायदेशीर कारवाई करण्यात येईल,’ अशी माहिती महाराष्ट्र राज्य वैधमापन शास्त्र, कोकण विभागाचे सहनियंत्रक शिवाजी काकडे यांनी दिली.
नागरी पुरवठा व ग्राहक संरक्षण विभागांतर्गत वैधमापन शास्त्र, कोकण विभागाच्यावतीने कोकण विभागातील सिंधुदुर्ग जिल्ह्यातील उत्पादक, आयातदार तसेच पेट्रोल-डिझेल वितरक आस्थापनांसाठी विशेष मार्गदर्शक सत्राचे आयोजन केले होते. कार्यक्रमास वैधमापनशास्त्र सिंधुदुर्ग जिल्ह्याचे उपनियंत्रक विकास लाटे, इतर वरिष्ठ अधिकारी, तसेच सिंधुदुर्ग जिल्ह्यातील उत्पादक, आयातदार व पेट्रोल-डिझेल वितरक आस्थापनांचे प्रतिनिधी मोठ्या संख्येने उपस्थित होते. या सत्रात पेट्रोल-डिझेल उत्पादक व आयातदारांनी उत्पादित व आयातीत वस्तूंवर नमूद करावयाच्या बंधनकारक माहितीबाबत विक्री प्रक्रियेत येणाऱ्या अडचणी, तसेच ग्राहकांच्या तक्रारी यावर सविस्तर चर्चा करण्यात आली.