रत्नागिरी-अंमली पदार्थांविरोधात कारवाया करा

अमली पदार्थांविरोधात कारवाया करा
मनुज जिंदल ः नार्को को-ओर्डिनेशन समिती बैठक
सकाळ वृत्तसेवा
रत्नागिरी, ता. २९ ः जिल्ह्यात ३१ डिसेंबर तसेच सध्याचा पर्यटन हंगाम लक्षात घेऊन सर्वच यंत्रणांनी सतर्क राहून अंमली पदार्थांविरोधात कारवाया करा, असे निर्देश जिल्हाधिकारी मनुज जिंदल यांनी दिली. नार्को को-ओर्डिनेशन यंत्रणेच्या जिल्हास्तरीय समितीच्या बैठकीत ते बोलत होते. या बैठकीला अपर पोलिस अधीक्षक बी. बी. महामुनी, समाजकल्याण साहाय्यक आयुक्त दीपक घाटे, अन्न व औषध प्रशासनचे साहाय्यक आयुक्त शशिकांत यादव, पोलिस निरीक्षक अश्वनाथ खेडकर, प्रांताधिकारी जीवन देसाई आदी उपस्थित होते. महामुनी यांनी सविस्तर आढावा‍ दिला. जिल्हाधिकारी जिंदल यांनी विभागनिहाय तसेच उपविभागानुसार सविस्तर आढावा घेतला.
ते म्हणाले, ‘कोस्टगार्डने बोटींची तपासणी करावी. येणाऱ्या ३१ डिसेंबर तसेच सध्याच्या पर्यटन हंगामाबाबत‍ पोलिसांसह सर्व यंत्रणांनी सतर्क राहून भरीव कारवाई करावी. पोलिसांनी पेट्रोलिंग वाढवून आपले गोपनीय नेटवर्क वाढवले पाहिजे. उपविभागीय पोलिस अधिकाऱ्यांकडे तसेच उपविभागीय अधिकाऱ्यांकडे प्रलंबित असणारी तडीपारीची प्रकरणे तत्काळ मार्गी लावावीत. शिक्षण विभागाने विद्यार्थ्यांमध्ये जनजागृती मोहीम राबवावी. शिक्षकांनाही सतर्क करावे. कृषी आणि वन विभागाने गांजाची लागवड होणार नाही, यासाठी सतर्क राहावे. गांजा सेवन प्रकरणात, तो कुठून आणला जातो याबाबत मुळाशी जाऊन तपास करावा. जास्तीत जास्त कारवाया झाल्या पाहिजेत.’