आडारी सातेरी मांड येथून ३० गावठी कोंबड्या चोरीस

आडारी सातेरी मांड येथून
३० गावठी कोंबड्या चोरीस
सकाळ वृत्तसेवा
मालवण, ता. ३० : शहरातील आडारी सातेरी मांड येथील एका कोंबडी पालनाच्या शेडमधून ३० गावठी कोंबड्यांची चोरी झाल्याची घटना उघडकीस आली आहे. याप्रकरणी चंद्रकांत जैतापकर यांनी मालवण पोलिस ठाण्यात दिलेल्या तक्रारीनुसार अज्ञात चोरट्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार - आडारी सातेरी मांड येथील चंद्रकांत पांडुरंग जैतापकर यांची त्यांच्या घराशेजारीच कोंबडी पालनाचे शेड आहे. शनिवारी (ता. २७) सायंकाळी ७.३० च्या सुमारास चोरट्याने शेडमधील विजेच्या वायर कापून आत असलेल्या एकूण ३० गावठी कोंबड्या चोरून नेल्या. प्रत्येक कोंबडीची किंमत अंदाजे १६० रुपये धरली असून ४,८०० रुपयांचे नुकसान झाल्याचे तक्रारीत नमूद केले आहे. पोलिसांनी याप्रकरणी भारतीय न्याय संहिता २०२३ च्या कलम ३०३(२) आणि ३२४(२) अन्वये चोरट्याविरुद्ध गुन्हा दाखल केला आहे. या प्रकरणाचा अधिक तपास मालवण पोलिस करत आहेत.