सुसाट वाहनांच्या वेगाला नियंत्रण

15291

वेगाला लगाम, अपघातांना आळा

दोडामार्ग पिंपळेश्वर चौकात अखेर गतिरोधक

सकाळ वृत्तसेवा
दोडामार्ग, ता. ३ : येथील पिंपळेश्वर चौकातील मुख्य बाजारपेठेत वारंवार होणाऱ्या अपघातांचे गांभीर्य लक्षात घेत नगराध्यक्ष चेतन चव्हाण व मित्रमंडळ यांनी बाजारपेठेतील चारही रस्त्यांवर गतिरोधक बसविण्याच्या केलेल्या मागणीची बांधकाम विभागाकडून पूर्तता करण्यात आली. शुक्रवारी (ता. २) गतिरोधक बसविण्याचे काम चालू करण्यात आले असून, यामुळे सुसाट येणाऱ्या वाहनांच्या वेगावर आता नियंत्रण राहणार आहे.
शहरात वाहनांची मोठ्या प्रमाणावर वर्दळ असते. विशेषतः पिंपळेश्वर चौकात अवजड वाहने तसेच कर्नाटक व कोल्हापूरमधील पोल्ट्री व्यावसायिकांची वाहने मोठ्या वेगाने गोव्याच्या दिशेने ये-जा करीत असतात. या वेगवान वाहतुकीमुळे पिंपळेश्वर चौकात वारंवार लहान-मोठे अपघात घडत होते. चौकाच्या चारही दिशांनी येणाऱ्या वाहनांमुळे नागरिक व वाहनचालकांसाठी हा परिसर अपघातप्रवण बनला होता. ही बाब लक्षात घेऊन नगराध्यक्ष चव्हाण व त्यांच्या मित्रमंडळींनी बांधकाम विभागाकडे पिंपळेश्वर चौकातील चारही रस्त्यांवर गतिरोधक बसविण्याची मागणी केली होती. या मागणीची दखल घेत बांधकाम विभागाने तातडीने कार्यवाही करत चारही रस्त्यांवर गतिरोधक बसविण्याची कार्यवाही सुरू केली. नगराध्यक्ष चव्हाण, नगरसेवक व मित्रमंडळींचे नागरिक, दुकानदार व वाहनचालकांनी आभार व्यक्त केले.