सावंतवाडीत ३१ जानेवारीला विभागीय कवयित्री संमेलन

सावंतवाडीत ३१ जानेवारीला
विभागीय कवयित्री संमेलन
सकाळ वृत्तसेवा
सावंतवाडी, ता. ५ः सिंधुदुर्गातील नामवंत कवी आरती प्रभू यांच्या स्मरणार्थ आरती मासिक व चिंतामणी साहित्य सहयोग प्रकाशन संस्था सावंतवाडी, श्रीराम वाचन मंदिर, सावंतवाडी व कोकण मराठी साहित्य परिषद शाखा सावंतवाडी यांच्या सहकार्याने १९ वे निमंत्रितांचे विभागीय कवयित्री संमेलन ३१ जानेवारीला आयोजित केले आहे. या संमेलनाच्या आयोजनासाठी ज्येष्ठ साहित्यिक उषा परब यांच्या मार्गदर्शनाखाली महिला समिती गठित केली आहे.
संमेलनासाठी महाराष्ट्र, गोवा, कर्नाटकातील प्रथितयश कवयित्री तसेच सिंधुदुर्ग व सावंतवाडीतील निवडक कवयित्रींना आमंत्रित केले आहे. संमेलनाच्या अध्यक्षस्थानी डॉ. पल्लवी बनसोडे (संस्थापक अध्यक्ष, शब्दवेल प्रतिष्ठान) असणार आहेत. संमेलनाचे उद्घाटन गोव्यातील कवयित्री, पत्रकार, नाट्यकर्मी कालिका बापट यांच्या हस्ते होणार आहे. याशिवाय डॉ. चित्रा गोस्वामी (रत्नागिरी), डॉ. लता ऐवळे कदम (सांगली), पूजा दिवाण (कोल्हापूर), श्रृती हजारे (गोवा) या प्रथितयश कवयित्रींचा समावेश आहे. या संमेलनाच्या माध्यमातून आरती मासिक स्त्रियांसाठी एक व्यासपीठ देत आहे. नव्या लिहित्या हातांचा शोध घेण्यासाठी व त्यांना प्रोत्साहन देण्यासाठी या संमेलनाच्या निमित्ताने सिंधुदुर्ग-गोवा मर्यादित नवोदित कवयित्रींसाठी काव्यलेखन स्पर्धा आयोजित केली आहे. स्पर्धकांनी २० जानेवारीपर्यंत आपल्या दोन कविता उषा परब, स्नेहांकुर, सर्वोदयनगर, सावंतवाडी, सिंधुदुर्ग ४१६५१० या पत्त्यावर पाठवाव्यात. अधिक माहितीसाठी संपर्क साधावा.
दरवर्षीप्रमाणे हे १९ वे संमेलन असंख्य काव्यप्रेमींच्या उपस्थितीत संपन्न होईल. सर्वांनी याचा लाभ घ्यावा, असे आवाहन संस्थेचे अध्यक्ष डॉ. जी. ए. बुवा, प्रभाकर भागवत, भरत गावडे, विठ्ठल कदम, संस्थेच्या सर्व पदाधिकाऱ्यांनी व्यक्त केला आहे.