सानिका सुतारची राष्ट्रीयपातळीवर झेप

सानिका सुतारची
राष्ट्रीय पातळीवर झेप
चिपळूण : येथील होतकरू खेळाडू सानिका सुतार हिने आपल्या सातत्यपूर्ण मेहनतीच्या जोरावर मोठे यश संपादन केले आहे. तिची नॅशनल तसेच ‘खेलो इंडिया युनिव्हर्सिटी गेम्ससाठी निवड झाली आहे. पुणे येथे वेस्ट झोन युनिव्हर्सिटी बॅडमिंटन स्पर्धा आयोजित करण्यात आली होती. या स्पर्धेत चुरशीच्या लढतीत सानिका आणि तिच्या संघाने उल्लेखनीय कामगिरी करत चौथा क्रमांक पटकावला. या उत्कृष्ट कामगिरीच्या जोरावर सानिकाची थेट राष्ट्रीय स्तरावरील स्पर्धांसाठी तसेच ‘खेलो इंडिया युनिव्हर्सिटी गेम्स’साठी निवड झाली आहे. तिच्या या यशामागे कठोर सराव, प्रशिक्षकांचे मार्गदर्शन आणि कुटुंबाचा पाठिंबा मोलाचा ठरला आहे.

सावर्डे विद्यालयात
सावित्रीबाई फुले जयंती
सावर्डे ः सावर्डे येथील गोविंदराव निकम माध्यमिक विद्यालयात क्रांतिज्योती सावित्रीबाई फुले यांची जयंती मोठ्या उत्साहात साजरी करण्यात आली. विद्यालयाच्या ज्येष्ठ शिक्षिका शिल्पा राजेशिर्के यांनी सावित्रीबाई फुले यांच्या प्रतिमेचे पूजन केले. मृण्मयी घाणेकर व कृष्णा खापरे यांनी सावित्रीबाई फुले यांच्या जीवनकार्याची माहिती प्रभावीपणे मांडली. स्फूर्ती जाधव यांनी सावित्रीबाई फुले यांनी स्त्रीशिक्षणासाठी केलेल्या अमूल्य कार्यावर प्रकाश टाकत त्यांच्या विचारांची आजच्या काळातील उपयुक्तता विशद केली. सावित्रीबाई फुले यांच्या जीवनावर आधारित भित्तीपत्रकाचे उद्‍घाटन अशोक शितोळे यांच्या हस्ते करण्यात आले. हा दिवस बालिका दिवस असल्याने ज्या विद्यार्थिनींचे वाढदिवस होते त्या मुलींना विद्यालयाचे मुख्याध्यापक राजेंद्र वारे यांच्या हस्ते गुलाबपुष्प देऊन शुभेच्छा देण्यात आल्या.

सोनगाव येथे
रस्ताकामाचे भूमिपूजन
चिपळूण ः सोनगाव येथे होणाऱ्या प्रधानमंत्री ग्रामसडक योजनेंतर्गत रस्ता कामाचे भूमिपूजन आमदार भास्कर जाधव यांच्या हस्ते झाले. या वेळी शिवसेना महिला जिल्हाप्रमुख अरुणा आंब्रे, तालुकाप्रमुख अंकुश काते, युवासेना तालुकाप्रमुख डॉ. मच्छिंद्र गोवळकर, महिला तालुका संघटिका संजीवनी नरळकर आदी उपस्थित होते. या कामासाठी ४ कोटी ३८ लाख रुपये मंजूर झाले आहेत.