रत्नागिरी-प्रलंबित अर्ज तत्काळ निकाली काढा

प्रलंबित अर्ज तत्काळ निकाली काढा
भाऊ गलांडे ः लोकशाही दिनात सात अर्ज प्राप्त
सकाळ वृत्तसेवा
रत्नागिरी, ता. ५ ः ज्या विभागाकडे अर्ज प्रलंबित आहेत ते तत्काळ मार्गी लावावेत, अशा सूचना अप्पर जिल्हाधिकारी भाऊ गलांडे यांनी लोकशाही दिनात दिल्या. या लोकशाही दिनात एकूण सात अर्ज प्राप्त झाले.
जिल्हाधिकारी कार्यालयातील सभागृहात सोमवारी (ता. ५) लोकशाही दिन झाला. या वेळी अप्पर पोलिस अधीक्षक बाबुराव महामुनी, निवासी उपजिल्हाधिकारी चंद्रकांत सूर्यवंशी, जिल्हा उपनिबंधक डॉ. सोपान शिंदे, उपमुख्य कार्यकारी अधिकारी विजयसिंह जाधव, अन्न व औषधचे सहाय्यक आयुक्त शशिकांत यादव, जिल्हा सैनिक कल्याण अधिकारी प्रविंद्र बिरादार आदी उपस्थित होते.
अप्पर जिल्हाधिकाऱ्यांनी मागील प्रलंबित अर्जांचा आढावा घेतला. नव्याने दाखल अर्जांबाबत काय कार्यवाही केली याबाबतही संबंधित विभागाने अहवाल देण्याबाबत सांगितले. मागील प्रलंबित अर्जांची संबंधित विभागाने निर्गत करावी, असे गलांडे म्हणाले. आजच्या जिल्हास्तरीय लोकशाही दिनात जिल्हा परिषद, जिल्हाधिकारी कार्यालय, जिल्हास्तरीय जात प्रमाणपत्र पडताळणी कार्यालय, जिल्हा नियोजन कार्यालय, रत्नागिरी प्रांत कार्यालय, जिल्हा पुरवठा कार्यालय आणि जिल्हा सैनिक कल्याण कार्यालयाकडील प्रत्येकी एक असे एकूण सात अर्ज दाखल झाले आहेत.