कलाकारांसाठी कलाकारांनी एकत्र यावे

कलाकारांसाठी कलाकारांनी एकत्र यावे
संतोष शिर्सेकर ः आभार मंडळ, भजन मंडळाची वार्षिक सभा
सकाळ वृत्तसेवा
रत्नागिरी, ता. ७ : कलाकारांना न्याय्य हक्क मिळण्यासाठी व हक्काच्या या व्यासपीठावर काम करण्यासाठी कलाकारांनीच कलाकारांसाठी एकत्र येणे ही काळाची गरज आहे. आभार सांस्कृतिक कला, क्रीडा मंडळ व रत्नागिरी जिल्हा प्रासादिक भजन मंडळ उत्तम प्रकारे काम करत आहेच आणि ध्येयही मोठे आहे, असे प्रतिपादन बुवा संतोष शिर्सेकर यांनी काढले.
दोन्ही संस्थांची वार्षिक सभा देवर्षी नगर सभागृहात अध्यक्ष साईनाथ नागवेकर यांच्या अध्यक्षतेखाली झाली. या वेळी सचिव वासुदेव वाघे, शरद गोळपकर, संजय सुर्वे, महिला मंडळ अध्यक्षा प्रेरणा विलणकर, सचिव समीक्षा वालम आदी उपस्थित होते.
मंडळाने महिलांना नमनकलेच्या माध्यमातून व्यासपीठ निर्माण करून दिले, ही खूप मोठी गोष्ट आहे. त्याबद्दल सर्वांनीच महिलांचे कौतुक केले आहेच; पण हे शिवधनुष्य ज्या महिलांनी उचलले आहे त्या सर्व महिलांना सलाम करावा लागेल. आज ही संस्था सर्व कलाकारांना व्यासपीठ द्यायला तयार आहे. आर्थिकदृष्ट्या मदतही करत आहे, असेही बुवा म्हणाले. या प्रसंगी प्रवीण सावंतदेसाई, संजय सुर्वे यांनी मनोगत व्यक्त केले. या वेळी ज्येष्ठ भजनी कलाकार मिलिंद आरेकर, संजय मेस्री, प्रसाद राणे, सागर मायंगडे, दादा वाडेकर, राकेश बेर्डे, निवास शिरगांवकर, मानसी साळवी, शीतल सकपाळ, सर्वता चव्हाण, रीमा देसाई, विनया काळप, रेश्मा शिंदे, वेदा शेट्ये आदी उपस्थित होते.