सातार्डा पुलावर पथदिव्यांसह सीसीटीव्ही बसवण्याची मागणी

16074

सातार्डा पुलावर पथदिव्यांसह
तातडीने ‘सीसीटीव्ही’ बसवा!

सकाळ वृत्तसेवा
सावंतवाडी, ता. ७ ः महाराष्ट्र आणि गोवा राज्यांना जोडणाऱ्या नाईबाग ते सातार्डा या पुलावर प्रवाशांच्या सुरक्षेसाठी तातडीने पथदिवे (स्ट्रीट लाईट) आणि सीसीटीव्ही कॅमेरे बसवण्यात यावेत, अशी मागणी नितीन कळंगुटकर यांनी केली आहे. या संदर्भात त्यांनी उप प्रादेशिक परिवहन अधिकारी, सिंधुदुर्ग यांना निवेदन दिले असून १५ दिवसांत कार्यवाही न झाल्यास आंदोलनाचा इशारा दिला आहे.
​या पुलावरून दररोज नोकरी, शिक्षण आणि व्यवसायासाठी मोठ्या प्रमाणात नागरिक व विद्यार्थ्यांची ये-जा असते. अनेकवेळा प्रवाशांना रात्री उशिरा यावे लागते. मात्र, पुलावर प्रकाशव्यवस्था नसल्याने अंधाराचा फायदा घेऊन मुलींची छेडछाड, चोरी आणि इतर गुन्हेगारी प्रकार घडण्याची भीती निर्माण झाली आहे. तसेच सीसीटीव्ही नसल्यामुळे अपघात किंवा अनुचित प्रकार घडल्यास त्याची माहिती मिळणे कठीण होत आहे. ​पुलावर होणारी अवैध वाहतूक आणि जड वाहनांच्या वर्दळीवर नियंत्रण मिळवण्यासाठी पोलीस चौकी व अधिकाऱ्यांना सीसीटीव्हीचा मोठा आधार मिळणार आहे. सध्या शासनाकडून पुलाच्या दुरुस्तीसाठी निधी मंजूर झाला असला तरी, त्यासोबतच सुरक्षेच्या दृष्टीने पथदिवे आणि सीसीटीव्ही लावणे अत्यंत गरजेचे असल्याचे निवेदनात म्हटले आहे. ​प्रशासनाने विशेष निधीतून ही कामे येत्या १५ दिवसांत मार्गी लावावीत, अन्यथा जनहितासाठी आंदोलन छेडले जाईल, असे कळंगुटकर यांनी स्पष्ट केले आहे.