जिल्‍हा बँक भरती रद्दचा घाट घातल्यास आंदोलन

16210

जिल्‍हा बँक भरती प्रक्रिया
रद्द केल्यास तीव्र आंदोलन

वैभव नाईक यांचा इशारा

कणकवली, ता. ७ : सिंधुदुर्ग जिल्हा मध्यवर्ती सहकारी बँकेने लिपिक पदाच्या ७३ जागांसाठी ०५ सप्टेंबर २०२५ रोजी भरती प्रक्रियेची जाहिरात प्रसिद्ध केली होती. या भरतीसाठी सर्व श्रेणीतील उमेदवारांकडून प्रत्येकी १,७७० रुपये अर्ज शुल्क आकारले. मात्र, जाहिरात प्रसिद्ध होऊन तसेच उमेदवारांनी अर्ज करून तब्बल चार महिने उलटून गेले, तरी अद्यापही ही भरती प्रक्रिया पूर्ण झाली नाही. ही प्रक्रिया रद्द केल्‍यास तीव्र आंदोलन छेडू, असा इशारा ठाकरे शिवसेनेचे माजी आमदार वैभव नाईक यांनी आज दिला.
श्री. नाईक यांनी याबाबत प्रसिद्धीपत्रक दिले आहे. त्यात म्हटले आहे की, नगरपरिषद, जिल्हा परिषद आणि पंचायत समितीच्या निवडणुका डोळ्यासमोर ठेवूनच ही भरती जाहीर केली होती का? ७३ जागांसाठी जिल्ह्यातील हजारो बेरोजगार युवक-युवतींनी अर्ज केले असून, त्यांच्या भवितव्याबाबत अनिश्चितता निर्माण झाली आहे. त्‍यामुळे ही भरती प्रक्रिया लवकर पूर्ण व्हायला हवी. मात्र, प्रक्रिया रद्द करण्याचा घाट घातला जात असल्यास शिवसेना उद्धव बाळासाहेब ठाकरे पक्ष गप्प बसणार नाही. प्रसंगी अर्ज दाखल केलेल्या हजारो युवक-युवतींना घेऊन सिंधुदुर्ग जिल्हा बँकेसमोर तीव्र स्वरूपाचे आंदोलन छेडू. भरती प्रक्रियेबाबत सिंधुदुर्ग जिल्हा बँकेचे मुख्य कार्यकारी अधिकाऱ्यांशी ई-मेलद्वारे पत्रव्यवहार करून भरती प्रक्रिया रखडण्याची कारणे, सद्यस्थिती तसेच ही प्रक्रिया कधीपर्यंत पूर्ण होणार याबाबत विचारणा केली आहे.’