संगमेश्वर तालुक्याला सर्वसाधारण विजेतेपद

संगमेश्वर तालुक्याला सर्वसाधारण विजेतेपद
शालेय हिवाळी क्रीडा स्पर्धा ; जिल्हास्तरावर छाप
सकाळ वृत्तसेवा
संगमेश्वर, ता. ११ ः नुकत्याच डेरवण येथे पार पडलेल्या जिल्हास्तरीय शालेय हिवाळी क्रीडा स्पर्धेमध्ये संगमेश्वर तालुक्याने लहान व मोठ्या दोन्ही गटांमध्ये उत्कृष्ट कामगिरी करत सर्वसाधारण विजेतेपद पटकावले आहे. संगमेश्वर तालुक्याने क्रीडा क्षेत्रातील आपले निर्विवाद वर्चस्व कायम राखले. या स्पर्धा ६ व ७ जानेवारी रोजी डेरवण येथे पार पडल्या.
संगमेश्वर तालुक्यातील खेळाडूंनी कौशल्य, जिद्द आणि संघभावनेचे दर्शन घडवत सर्वाधिक गुणांची कमाई केली. सातत्यपूर्ण यशाची परंपरा कायम राखत तालुक्यातील खेळाडूंनी जिल्हास्तरावर आपली चमकदार छाप उमटवली. क्रीडा क्षेत्रात आपला संगमेश्वर तालुक्याचा दादा संघ असल्याचे संगमेश्वरच्या खेळाडूंनी सिद्ध केले. या यशाबद्दल शिक्षणाधिकारी किरण लोहार यांनी संगमेश्वर तालुक्याचे विशेष अभिनंदन केले. खेळाडूंमध्ये असलेली शिस्त, नियोजनबद्ध सराव आणि स्पर्धात्मक आत्मविश्वास हीच या यशाची खरी गुरुकिल्ली असल्याचे त्यांनी सांगितले. तसेच यापुढे हीच घोडदौड कायम राखावी, असे आवाहनही केले.
या स्पर्धेच्या सांगता समारंभ प्रसंगी बोलताना संगमेश्वर तालुक्याचे गटशिक्षणाधिकारी विजय परीट म्हणाले, तालुक्यातील सर्व क्रीडाशिक्षक, खेळाडू आणि प्रशासकीय अधिकारी यांनी अत्यंत काटेकोर नियोजन, जिद्द, चिकाटी आणि मेहनतीने काम केल्यामुळेच हे घवघवीत यश प्राप्त झाले आहे. संगमेश्वर तालुक्याच्या यशामुळे संपूर्ण तालुक्यात आनंदाचे व उत्साहाचे वातावरण निर्माण झाले असून, आगामी राज्यस्तरीय स्पर्धांसाठी खेळाडूंना ही कामगिरी निश्चितच प्रेरणादायी ठरणार आहे. शालेय क्रीडा क्षेत्रात संगमेश्वर तालुका हा गुणवत्तेचा, सातत्याचा आणि यशाचा मानबिंदू ठरत असल्याचे या यशाने पुन्हा एकदा अधोरेखित केले आहे.