विज्ञानामुळे देश प्रगतीच्या दिशेने

16927

विज्ञानामुळे देश प्रगतीच्या दिशेने

प्रा. देसाई ः सावंतवाडीत जिल्हास्तरीय विज्ञान प्रदर्शन

सकाळ वृत्तसेवा
सावंतवाडी, ता. ११ ः भारत हा शास्त्रज्ञांच्या सहकार्याने महान देश बनत असून विद्यार्थ्यांनी यात योगदान द्यावे, असे आवाहन सिंधुदुर्ग जिल्हा शिक्षण प्रसारक मंडळाचे संचालक प्रा. डी. टी. देसाई यांनी जिल्हास्तरीय विज्ञान प्रदर्शनाच्या उद्‍घाटनप्रसंगी केले.
येथील श्री पंचम खेमराज महाविद्यालयात (स्वायत्त) दोन दिवसीय जिल्हास्तरीय विज्ञान प्रदर्शनाचे उद्‍घाटन सिंधुदुर्ग जिल्हा शिक्षण प्रसारक मंडळाच्या कार्याध्यक्षा राणीसाहेब शुभदादेवी भोसले यांच्या हस्ते करण्यात आले. ​कार्यक्रमाच्या अध्यक्षस्थानी संस्थेचे संचालक प्रा. डी. टी. देसाई होते. व्यासपीठावर सहसंचालक ॲड. शामराव सावंत, कार्यकारिणी सदस्य जयप्रकाश सावंत, प्राचार्य डॉ. डी. एल. भारमल आदी उपस्थित होते. यावेळी विज्ञान क्षेत्रातील योगदानाबद्दल सिंधुदुर्ग जिल्हा विज्ञान मंडळाचे अध्यक्ष पांडुरंग काकतकर यांचा विशेष सत्कार करण्यात आला. सत्कारला उत्तर देताना श्री. काकतकर यांनी एसपीके महाविद्यालयातील प्राध्यापकांच्या मार्गदर्शनामुळे जिल्ह्याच्या विज्ञान मंडळाला मोठी मदत होत असल्याचे सांगत कृतज्ञता व्यक्त केली.
​प्रा. डी. टी. देसाई यांनी आपल्या भाषणात तंत्रज्ञानातील भविष्यातील संधींवर प्रकाश टाकला. विद्यार्थ्यांच्या सुप्त गुणांना वाव मिळावा आणि त्यांना आधुनिक तंत्रज्ञानाची माहिती व्हावी, या हेतूने हे प्रदर्शन आयोजित केल्याचे त्यांनी सांगितले. प्राचार्य डॉ. डी. एल. भारमल यांनी प्रदर्शनाच्या आयोजनामागची भूमिका स्पष्ट केली. ​प्रारंभी डॉ. व्ही. पी. सोनाळकर यांनी प्रास्ताविक केले. डॉ. जी. एस. मर्गज यांनी सूत्रसंचालन केले. प्रा. व्ही. पी. राठोड यांनी आभार मानले.