गोठेगावच्या अपेक्षेची अंतराळभरारी

- rat16p11.jpg-
P26O18142
गोठेगाव : गावातील ग्रामस्थ, महिला मंडळाच्यावतीने अपेक्षा बोतरे हिचे अभिनंदन करून शुभेच्छा देण्यात आल्या.

अपेक्षा बोतरेची नासा, इस्त्रो
अभ्यास दौऱ्यासाठी निवड
सकाळ वृत्तसेवा
मंडणगड, ता. १६ ः साधी परिस्थिती; पण असाधारण स्वप्ने उराशी बाळगणाऱ्या मंडणगड तालुक्यातील जिल्हा परिषद आदर्श शाळा गोठे बोरखत या शाळेची विद्यार्थिनी अपेक्षा सुनील बोतरे हिने आपल्या कर्तृत्वाने तालुक्याचा नावलौकिक वाढवला आहे. सातवीत शिकणाऱ्या अपेक्षाची नासा आणि इस्रो या जागतिक कीर्तीच्या अंतराळ संस्थांच्या शैक्षणिक अभ्यासदौऱ्यासाठी निवड झाली आहे. आई-वडील मुंबईत कामानिमित्त राहत असल्याने अपेक्षा आजी -आजोबांसोबत गोठेगाव येथे राहते. घरातील परिस्थितीची जाणीव ठेवत ती अभ्यासाबरोबरच आजीला घरकामात, जेवण करण्यापासून ते भांडी घासण्यापर्यंत मोलाची मदत करते. ५वी आणि ६वीमध्ये ती तालुकास्तरापर्यंत पोहोचली. ७वीमध्ये तिने केंद्रस्तरावर तालुक्यातील ९४७ विद्यार्थ्यांतून दुसरा क्रमांक पटकावला. तालुकास्तरावर ७९ विद्यार्थ्यांतून पहिल्या १० मध्ये स्थान मिळवले. पुढे जिल्हास्तरावर मुलाखत व प्रात्यक्षिक फेरीत तिची कामगिरी उल्लेखनीय ठरली आणि त्यातूनच नासा इस्रो दौऱ्यासाठी निवड निश्चित झाली.