दापोलीत २४०० दुबार मतदार

दापोलीत २४०० दुबार मतदार
डॉ. सूर्यवंशी ः महिलांच्या हाती निकालाची दोरी
सकाळ वृत्तसेवा
दापोली, ता. १६ : दापोली तालुक्यात सहा जिल्हा परिषद गट व १२ पंचायत समिती गण असून, एकूण २१३ मतदान केंद्रांवर मतदान होणार आहे. तालुक्यातील एकूण मतदारसंख्या १ लाख ४० हजार ५५८ असून, त्यामध्ये ६६ हजार ६६७ पुरुष व ७३ हजार ८९१ महिला मतदारांचा समावेश आहे. तसेच सुमारे २ हजार ४०० दुबार मतदार असल्याची माहिती देण्यात आली.
जिल्हा परिषद व पंचायत समितीच्या निवडणुका जाहीर झाल्यानंतर दापोली तालुक्यात निवडणूक प्रक्रिया पार पाडण्यासाठी प्रशासनाने तयारी पूर्ण केली असून, संपूर्ण यंत्रणा सज्ज असल्याची माहिती प्रांताधिकारी तथा जिल्हा परिषद व पंचायत समिती २०२६ निवडणूक निर्णय अधिकारी डॉ. विजयकुमार सूर्यवंशी यांनी पत्रकार परिषदेत दिली. ७ फेब्रुवारीला सकाळी १० वाजल्यापासून डॉ. बाळासाहेब सावंत कोकण कृषी विद्यापीठातील सर विश्वेश्वरैय्या सभागृहात मतमोजणी होणार आहे. निवडणूक कामकाजासाठी १ हजार २१७ अधिकारी व कर्मचारी नियुक्त करण्यात आले आहेत. मतदान केंद्रावर मोबाईल फोन नेण्यास बंदी घालण्यात आली आहे. जालगाव मतदार केंद्रावर ‘सखी मतदार केंद्र’ उभारण्यात येणार असून, प्रत्येक केंद्रावर पोलिस बंदोबस्त ठेवण्यात येणार आहे. निवडणूक प्रक्रिया शांततेत पार पाडण्यासाठी प्रशासन सज्ज असून, मतदारांनी मोठ्या संख्येने मतदान करावे, असे आवाहन डॉ. सूर्यवंशी यांनी केले.