निवडणूक कार्यालयाबाहेर उमेदवाराचे निधन

अर्ज छाननीवेळी
इच्छुक उमेदवाराचा मृत्यू
संगमेश्वर, ता. २३ ः तालुक्यातील धामणी गणातून आम आदमी पक्षाकडून निवडणूक लढवणारे कुंभारखाणी बुद्रुक येथील सुजित गणपत सुर्वे (वय ५७) यांचे तहसील कार्यालयाबाहेर हृदयविकाराच्या तीव्र झटक्याने निधन झाले. गुरुवारी (ता. २२) तहसील कार्यालयात उमेदवारी अर्ज छाननी होती. त्यासाठी सुर्वे हे कार्यालयाच्या बाहेर प्रवेश करताच पोर्चबाहेरच त्यांच्या छातीत जोरदार कळ येऊन ते खाली पडले. त्यांना त्वरित सरकारी रुग्णालयात उपचार सुरू असतानाच त्यांचा मृत्यू झाला. त्यांना रुग्णालयात दाखल करण्यासाठी त्यांचे मावस भाऊ अनिल सुर्वे, उद्धव बाळासाहेब ठाकरे शिवसेनेचे संतोष थेराडे, मुन्ना थरवळ, इस्तियाक कापडी, काँग्रेसचे तालुकाध्यक्ष काशिनाथ वाजे, आशिष सुर्वे व अन्य सहकारी यांनी मदत केली. त्यांची पत्नी, मुलांसह नातलग मुंबईत असल्याने त्यांचा मृतदेह मुंबई येथे नेण्यात आला. त्यांनी उमेदवारी अर्ज दाखल केला होता.