‘मराठी’ टिकवण्यासाठी वाचन करा

20021

‘मराठी’ टिकविण्यासाठी वाचन करा

संग्राम कासले : मालवण न्यायालयात मार्गदर्शन

सकाळ वृत्तसेवा
मालवण, ता. २५ : मराठी भाषा ही आपली संस्कृती आहे. ती टिकविण्यासाठी मराठी साहित्याचे वाचन होणे अत्यंत गरजेचे आहे. पालकांनी स्वतः मराठी साहित्य वाचून आपल्या पाल्यांना वाचनासाठी प्रोत्साहित करावे, असे प्रतिपादन समुपदेशक संग्राम कासले यांनी येथे केले.
येथील न्यायालयात मराठी भाषा संवर्धन पंधरवडा कार्यक्रमाचे आयोजन करण्यात आले. यावेळी सहाय्यक अधीक्षक एस. एन. पालव, सहाय्यक अधीक्षक एम. एम. मोर्ये यांच्यासह न्यायालयातील कर्मचारी उपस्थित होते. श्री. कासले म्हणाले, ‘‘आजची युवा पिढी सोशल मीडियामुळे वाचनापासून दूर जात आहे. त्यांना पुन्हा वाचन संस्कृतीशी जोडणे आवश्यक आहे. कारण वाचनातूनच मूल्ये आणि संस्कार रुजतात. मुलांमध्ये वाचनाची गोडी निर्माण करण्यासाठी पालकांनी घरातूनच वाचनाला सुरुवात करणे आवश्यक आहे. सिंधुदुर्ग जिल्ह्यात सार्वजनिक वाचनालये उपलब्ध असली तरी तिथे जाणाऱ्या तरुणांचे प्रमाण कमी झाले आहे. हे प्रमाण वाढविण्यासाठी ठोस उपाययोजनांची गरज आहे. शाळा आणि महाविद्यालयीन स्तरावर निबंध स्पर्धा, वक्तृत्व स्पर्धा, वाचक स्पर्धा आणि काव्यवाचन अशा उपक्रमांचे सातत्याने आयोजन केल्यास युवा पिढी पुन्हा मराठी साहित्याकडे वळेल,’’ असे त्यांनी स्पष्ट केले. कनिष्ठ लिपिक सुविधा जाधव यांनी सूत्रसंचालन, तसेच आभार मानले.