गुळदुवेत निबंध लेखन स्पर्धेस प्रतिसाद

swt281.jpg
20459
गुळदुवे ः वाचनालयाचे वयोवृद्ध रोजवाचक अनंत धर्णे यांचा अध्यक्ष फटू धर्णे यांच्या हस्ते शाल, श्रीफळ देऊन सत्कार करण्यात आला.

गुळदुवेत निबंध लेखन स्पर्धेस प्रतिसाद
‘ज्ञानदीप’चे आयोजनः मराठी भाषा संवर्धन पंधरवडा उत्साहात
सकाळ वृत्तसेवा
आरोंदा, ता. २८ ः मराठी भाषा संवर्धन पंधरवडा निमित्त ज्ञानदीप वाचनालय गुळदुवे येथे सोमवारी (ता. २६) मुलांची निबंध लेखन स्पर्धा घेण्यात आली. या स्पर्धेत २० स्पर्धकांनी भाग घेतला. यावेळी पुस्तक प्रदर्शनाचेही आयोजन केले होते.
त्यानंतर वाचनालयाचे अध्यक्ष फटू धर्णे यांच्या अध्यक्षतेखाली सभा घेण्यात आली. व्यासपीठावर उपसरपंच अशोक धर्णे, प्रमुख पाहुणे डोंगरपाल हायस्कूलचे निवृत्त शिक्षक बाळकृष्ण राणे, कार्यवाह अरुण धर्णे, खजिनदार ज्योती पेंडसे, अनंत धर्णे, सोनू धर्णे, गीता धर्णे होत्या. उपस्थित मान्यवरांचे स्वागत गुलाबपुष्प देऊन करण्यात आले.
मार्च २०२५ च्या माध्यमिक शालांत परीक्षेत गुळदुवे गावातून उत्तीर्ण झालेल्या मुलांचा सत्कार करण्यात आला. वाचनालयाचे वयोवृद्ध रोजवाचक अनंत धर्णे यांचा शाल व श्रीफळ देऊन वाचनालयाचे अध्यक्ष धर्णे यांच्या हस्ते तर दुसरे वयोवृद्ध रोजवाचक सोनू धर्णे यांचा सत्कार प्रमुख पाहुणे बाळकृष्ण राणे यांच्या हस्ते करण्यात आला.
यावेळी अनंत धर्णे यांनी आपल्या शालेय जीवनातील आठवणी सांगितल्या. गावातील वाचनालयाचा लाभ घेऊन आपले ज्ञान अद्ययावत करा, असा संदेश त्यांनी मुलांना दिला. श्री. राणे यांनी मुलांना संस्कारक्षम कथा सांगितल्या. वाचनाचा छंद बालपणापासून कसा जोपासला ते सांगितले. कमी बोला, जास्त निरीक्षण करा, माणसे ओळखायला शिका, असेही त्यांनी सांगितले. अशोक धर्णे यांनी स्पर्धांत भाग घेऊन विद्यार्थ्यांनी आपला व्यक्तिमत्त्व विकास साधला पाहिजे, असे सांगितले.
या कार्यक्रमाला रमाकांत शेटकर, भार्गव धर्णे, संदीप आडारकर, वर्षा मामलेकर, सिद्धी कारेकर, रुपेश धर्णे, ग्रंथपाल नंदकिशोर धर्णे, कर्मचारी अनिल जोशी, विद्यार्थी आणि पालक उपस्थित होते. अरुण धर्णे यांनी आभार मानले.