रत्नागिरी- ''संगीत समिधा''चा रत्नागिरीत १८ ला

''संगीत समिधा''चा
शनिवारी प्रयोग
रत्नागिरी, ता. १५ : महाराष्ट्र शासनाच्या ६४व्या संगीत राज्य नाट्यस्पर्धेत कलारंग नाट्यप्रतिष्ठान (वरवडे- खंडाळा) संस्थेने सादर केलेले रजपुतांच्या ज्वलंत इतिहासाची धगधगती कथा असलेले संगीत समिधा नाटक रत्नागिरीत सादर होणार आहे. येत्या शनिवारी (ता. १८) सायंकाळी ७ वाजता स्वा. सावरकर नाट्यगृहात हा प्रयोग होणार असल्याची माहिती संस्थेचे अध्यक्ष अरूण जोशी, दिग्दर्शक नितीन जोशी यांनी पत्रकार परिषदेत दिली. अमेय धोपटकर यांच्या लेखणीतून साकारलेले हे नाटक रजपुतांच्या इतिहासावर आधारित आहे. एकूण १३ कलाकार यात असून, ३ कलाकारांनी प्रथमच रंगमंचावर पदार्पण केले आहे. या वेळी नाटकातील सेनापती गोरा ही प्रमुख भूमिका साकारणारे कलाकार विनायक उर्फ राजू जोशी, संगीत दिग्दर्शक विजय रानडे आणि ऋग्वेद रानडे उपस्थित होते. रजपुतांचा हा इतिहास संगीत नाटकातून समोर आणण्याचे काम संस्थेने केले आहे. हे नाटक पाहण्यासाठी रसिकांनी अवश्य यावे, असे आवाहन अध्यक्ष अरूण जोशी यांनी केले.