तांत्रिक कारणास्तव कम्युनिटी सेंटर; पण होणार बुद्धविहारच

बुद्धविहारावरून दिशाभूल थांबवा
मारुती कांबळे ः निधीसाठी ‘कम्युनिटी सेंटर’चा वापर
सकाळ वृत्तसेवा
रत्नागिरी, ता. १७ : राज्य उत्पादन शुल्क विभागाच्या परिसरातील जागेवर केवळ आणि केवळ भव्य बुद्धविहारच साकारले जाणार आहे. काही समाजबांधव तांत्रिक शब्दांचा आधार घेऊन जाणीवपूर्वक नागरिकांची दिशाभूल करत आहेत. तांत्रिक कारणास्तव ‘कम्युनिटी सेंटर’ शब्दाचा वापर केला आहे. ही ऐतिहासिक वास्तू समाजाच्या अस्मितेचे प्रतीक ठरणार असून, तिचे पावित्र्य जपण्याची जबाबदारी ट्रस्टची आहे, अशी स्पष्ट भूमिका बुद्धविहार चॅरिटेबल ट्रस्टचे उपाध्यक्ष मारुती कांबळे यांनी मांडली.
शासकीय विश्रामगृहात पत्रकार परिषदेत ते बोलत होते. या वेळी जिल्हा परिषद समाजकल्याण सभापती सुयोग कांबळे, सुहास कांबळे, कायदेशीर सल्लागार शिवराज जाधव, कोषाध्यक्ष प्रीतम अहिरे यांच्यासह शशिकांत कांबळे आदी उपस्थित होते. ते म्हणाले, ​थिबा राजाकालीन ऐतिहासिक बुद्धविहार परिसराचा विकास व्हावा, अशी मागणी अनेक वर्षांपासून समाजबांधवांकडून केली जात होती. यासाठी स्थापन झालेल्या ‘थिबा राजाकालीन बुद्धविहार स्थळ विकास चॅरिटेबल ट्रस्ट’ने सातत्याने पाठपुरावा केला. या प्रयत्नांना यश मिळून पालकमंत्री उदय सामंत आणि मंत्री शंभूराज देसाई यांच्या सहकार्याने १७.५० गुंठे शासकीय जमीन बुद्धविहारासाठी मंजूर करण्यात आली.
या कामासाठी शासकीय निधीची तरतूद करताना एक तांत्रिक अडचण निर्माण झाली. शासकीय नियमांनुसार ‘बुद्धविहार’ या नावाने थेट निधी उपलब्ध करून देण्याची तरतूद नसल्याने, प्रशासकीय स्तरावर तो निधी ‘कम्युनिटी सेंटर’ या शीर्षकाखाली मंजूर करण्यात आला आहे.