जिल्ह्यात उत्साहाचे वातावरण

जिल्ह्यात अक्षय्य तृतीयेनिमित्त
श्रद्धा, परंपरा, खरेदीचा मेळ

सावंतवाडी, ता.१९ ः जिल्ह्यात आज अक्षय्य तृतीया सण मोठ्या उत्साहात आणि पारंपरिक पद्धतीने साजरा करण्यात आला. सकाळपासूनच मंदिरांमध्ये भाविकांची गर्दी दिसून आली होती. विशेषतः देवी-देवतांच्या मंदिरांमध्ये पूजाअर्चा, अभिषेक आणि आरती कार्यक्रमांचे आयोजन केले होते. अनेक कुटुंबांनी घरोघरी लक्ष्मीपूजन करून सुवर्ण खरेदी, धान्य खरेदी यासारख्या शुभ कार्यांना सुरुवात केली.
अक्षय्य तृतीया हा साडेतीन मुहूर्तांपैकी एक मानला जात असल्याने या दिवशी नवीन उपक्रमांची सुरुवात करण्याला विशेष महत्त्व दिले जाते. त्यामुळे आजच्या दिवशी अनेकांनी नवीन व्यवसाय, बांधकाम कामे तसेच वाहन खरेदी यांचा प्रारंभ केला. जिल्ह्यातील बाजारपेठांमध्ये सकाळपासूनच खरेदीसाठी नागरिकांची मोठी गर्दी उसळली होती. सुवर्ण दागिन्यांच्या दुकानांमध्ये ग्राहकांची विशेष वर्दळ दिसून आली, तर फळबाजारात हापूस आंब्याला मोठी मागणी होती.
ग्रामीण भागातही हा सण तितक्याच उत्साहात साजरा करण्यात आला. शेतकरी वर्गाने आपल्या शेतात पूजा करून चांगल्या उत्पन्नासाठी प्रार्थना केली. काही ठिकाणी सामूहिक पूजांचे आयोजन करण्यात आले होते. महिलांनी पारंपरिक वेशभूषेत एकत्र येत हळदी-कुंकू कार्यक्रम घेतले, तर लहान मुलांनीही या सणाचा आनंद घेतला. एकंदरीत, सिंधुदुर्ग जिल्ह्यात अक्षय्य तृतीया सण धार्मिक श्रद्धा, पारंपरिक संस्कृती आणि उत्साहाच्या वातावरणात साजरा झाल्याचे चित्र पाहायला मिळाले.