देवरुख ः विद्यार्थ्यांच्या पाठीवरील दप्तराचे ओझे कायम

विद्यार्थ्यांच्या दप्तराचे ओझे कायम
नियम कागदावरच; पालकांच्यात नाराजी
सकाळ वृत्तसेवा
देवरूख, ता. १५ ः विद्यार्थ्यांच्या पाठीवरील दप्तराचे वाढते ओझे हा प्रश्न पुन्हा एकदा चर्चेत आला आहे. विद्यार्थ्यांच्या आरोग्याचा विचार करून शासनाने दप्तराचे वजन कमी करण्यासाठी स्पष्ट नियमावली लागू केली असली, तरी अनेक शाळांमध्ये या नियमांची प्रभावी अंमलबजावणी होत नसल्याचे चित्र दिसत आहे. परिणामी, इयत्तेनुसार निश्चित करण्यात आलेल्या मर्यादेपेक्षा अधिक वजनाचे दप्तर विद्यार्थ्यांना रोज वाहून न्यावे लागत असून, पालकांमधून तीव्र नाराजी व्यक्त होत आहे.
शासनाने शाळांसाठी नियमावली तयार करून विद्यार्थ्यांच्या इयत्तेनुसार दप्तराचे कमाल वजन निश्चित केले. तसेच शाळांनी वेळापत्रकानुसार आवश्यक तीच पुस्तके आणि वह्या विद्यार्थ्यांकडून आणून घ्यावीत, वर्गात किंवा शाळेत पुस्तक ठेवण्याची व्यवस्था करावी तसेच अनावश्यक साहित्य दप्तरात ठेवण्यास प्रतिबंध करावा, अशा सूचना देण्यात आल्या होत्या; मात्र प्रत्यक्षात अनेक शाळांमध्ये विद्यार्थी रोज सर्व विषयांची पुस्तके, वह्या, गृहपाठाच्या वह्या, प्रकल्प साहित्य, चित्रकला साहित्य, पाण्याची बाटली आणि डबा अशा अनेक वस्तू घेऊन येतात. प्राथमिक वर्गातील विद्यार्थ्यांना हे जड दप्तर वाहून नेणे अधिक त्रासदायक ठरत असल्याचे पालक सांगतात. शाळांकडून दप्तर तपासणी होणे अपेक्षित असताना अनेक ठिकाणी त्याकडे दुर्लक्ष होत असल्याचा आरोप पालकांनी केला आहे. डिजिटल शिक्षणाचा वाढता वापर, शाळेत पुस्तकांसाठी स्वतंत्र कपाटांची व्यवस्था तसेच वेळापत्रकाचे योग्य नियोजन केल्यास विद्यार्थ्यांच्या दप्तराचे वजन मोठ्या प्रमाणात कमी होऊ शकते.
--------
कोट १
शाळांनी वेळापत्रकानुसार आवश्यक तीच पुस्तके आणण्याचे बंधन घालावे. विद्यार्थ्यांच्या आरोग्याचा विचार करून दप्तर तपासणी नियमित केली तरच शासनाचा उद्देश साध्य होईल.
-संदीप शिंदे, पालक, देवरूख
------
कोट २
माझा पाल्य प्राथमिक शाळेत आहे. रोज इतके जड दप्तर घेऊन जाताना त्याला त्रास होतो. शासनाने नियम केले असले तरी त्यांची अंमलबजावणी होत नसल्याने मुलांनाच त्याचा फटका बसत आहे
नीलांबरी कानाल, संगमेश्वर