सावंतवाडीत सप्टेंबरला ''इस्कॉन''तर्फे जन्माष्टमी

सावंतवाडीत सप्टेंबरला
‘इस्कॉन’तर्फे जन्माष्टमी
​सावंतवाडी : येथील आंतरराष्ट्रीय श्रीकृष्ण भावनामृत संघाच्या (इस्कॉन) वतीने ५ सप्टेंबरला श्रीकृष्ण जन्माष्टमी महोत्सव आयोजित केला आहे. हा सोहळा सायंकाळी ५.३० वाजता येथील पालिकेच्या बॅ. नाथ पै सभागृहात पार पडणार आहे. ​या महोत्सवामध्ये भजन, कीर्तन, भगवान श्रीकृष्णांचा अभिषेक, प्रवचन, नाटिका आणि कृष्णप्रसादाचे आयोजन करण्यात आले आहे. याप्रसंगी इस्कॉन पंढरपूरचे वक्ते सहस्रनाम प्रभुजी उपस्थितांना मार्गदर्शन करणार आहेत. ​ज्या भाविकांना दूध, दही, अन्नधान्य, फुले व फळे आदी वस्तूंचे दान करायचे असेल, त्यांनी मंडळाशी संपर्क साधावा. .................
राजर्षी शाहू महाराज
शिष्यवृत्ती योजना
सिंधुदुर्गनगरी ः देशातील नामांकित शैक्षणिक संस्थांमध्ये उच्च शिक्षण घेणाऱ्या अनुसूचित जाती व नवबौद्ध घटकातील विद्यार्थ्यांसाठी समाज कल्याण विभागामार्फत ''राजर्षी शाहू महाराज गुणवत्ता शिष्यवृत्ती योजना'' राबविण्यात येत आहे. शैक्षणिक वर्ष २०२६-२७ साठी पात्र विद्यार्थ्यांनी या योजनेचा लाभ घेण्यासाठी विहित नमुन्यातील अर्ज ४ सप्टेंबरपर्यंत सादर करावेत, असे आवाहन सहायक आयुक्त, समाज कल्याण यांनी केले आहे. योजनेची सविस्तर माहिती, जाहिरात, अर्जाचा नमुना व नियमावली महाराष्ट्र शासनाच्या संकेतस्थळावर उपलब्ध आहे. इच्छुक विद्यार्थ्यांनी संकेतस्थळावरून विहित अर्जाचा नमुना डाउनलोड करून अर्ज परिपूर्ण भरावा व आवश्यक कागदपत्रांसह ४ सप्टेंबरपर्यंत आयुक्त, समाज कल्याण आयुक्तालय, पुणे येथे सादर करावा.
...................
सिंधुदुर्गनगरीत सोमवारी
महिला लोकशाही दिन
सिंधुदुर्गनगरी ः ऑगस्ट महिन्यातील जिल्हास्तरीय महिला लोकशाही दिन सोमवारी (ता. १७) सकाळी ११ ते दुपारी १ या वेळेत जिल्हाधिकारी कार्यालय सिंधुदुर्गनगरी येथे आयोजित केला आहे. जिल्ह्यातील समस्याग्रस्त व पीडित महिलांनी शासनाने उपलब्ध करून दिलेल्या व्यासपीठाचा उपयोग आपल्या अडचणी सोडविण्यासाठी करावा, असे आवाहन जिल्हा महिला व बाल विकास अधिकारी बापू शिणगारे यांनी केले आहे. समस्याग्रस्त व पीडित महिलांनी त्यांच्या अडचणी मांडण्यासाठी विहित नमुन्यातील अर्ज जिल्हा महिला व बालविकास अधिकारी कार्यालय, प्रशासकीय इमारत सिंधुदुर्गनगरी ओरोस येथून उपलब्ध करून घ्यावेत. अर्ज विहित नमुन्यात असावा. तक्रार, निवेदन वैयक्तिक स्वरुपाचे असावे. न्याय प्रविष्ठ प्रकरणे, विहित नमुन्यात नसणारे व आवश्यक ती कागदपत्र न जोडलेले अर्ज किंवा सेवा विषयक, आस्थापना विषयक बाबी, तक्रार, निवेदने वैयक्तिक स्वरुपाचे नसेल तर अर्ज स्वीकारले जाणार नाहीत.
..................
तीन स्थानिक
सुट्या जाहीर
सिंधुदुर्गनगरी ः जिल्ह्यातील महसूल हद्दीतील शासनाच्या सर्व कार्यालयांसाठी २०२६ करिता तीन स्थानिक सुट्या जाहीर करण्यात आल्या आहेत. त्यानुसार १७ ऑगस्ट (नागपंचमी), १८ सप्टेंबर (ज्येष्ठागौरी पूजन) आणि ९ नोव्हेंबर (धनत्रयोदशी) या दिवशी स्थानिक सुटी राहणार आहे. याबाबतची अधिसूचना जिल्हाधिकारी सिंधुदुर्ग यांनी जारी केली आहे.
...........
ग्रंथालय पुरस्कारासाठी
अर्ज देण्याचे आवाहन
सिंधुदुर्गनगरी : २०२५-२६ करिता डॉ. बाबासाहेब आंबेडकर उत्कृष्ट सार्वजनिक ग्रंथालय पुरस्कार तसेच डॉ. एस. आर. रंगनाथन उत्कृष्ट ग्रंथालय कार्यकर्ता व सेवक (ग्रंथमित्र) पुरस्कार प्रदान करण्यात येणार आहेत. जिल्ह्यातील सर्व नोंदणीकृत शासनमान्य सार्वजनिक ग्रंथालयांनी तसेच पात्र ग्रंथालय कार्यकर्ता व सेवकांनी पुरस्कारासाठीचे प्रस्ताव तीन प्रतींमध्ये २५ सप्टेंबरपर्यंत जिल्हा ग्रंथालय अधिकारी कार्यालय, सिंधुदुर्ग येथे सादर करावेत. जिल्ह्यातील शासनमान्य ग्रंथालयांनी पुरस्कारासाठीचे प्रस्ताव विहित नमुन्यात व आवश्यक कागदपत्रांसह मुदतीत सादर करून या संधीचा लाभ घ्यावा, असे आवाहन ग्रंथालय संचालक अशोक गाडेकर यांनी केले आहे.
.................