वारी छायाचित्र स्पर्धेत नंदुरबारचे जयेश राजपूत अव्वल

वारी छायाचित्र स्पर्धेत नंदुरबारचे जयेश राजपूत अव्वल

पंढरपूरचे राहुल गोडसे द्वितीय; तर धनराज कडलाख यांना तृतीय क्रमांक

पुणे, ता. २ ः ‘सकाळ माध्यम समूहा’तील ‘सकाळ सोशल फाउंडेशन’च्या वतीने आषाढी वारीनिमित्त आयोजित करण्यात आलेल्या ‘इंद्रायणी ते चंद्रभागा- एक चित्रप्रवास’ या छायाचित्र स्पर्धेत नंदुरबार येथील जयेश राजपूत यांनी पाठविलेल्या छायाचित्राने प्रथम क्रमांकाचे पंधरा हजार रुपयांचे पारितोषिक पटकाविले. पंढरपूरचे राहुल गोडसे यांनी दहा हजार रुपयांचे द्वितीय, तर धनराज कडलाख यांनी सात हजार रुपयांचे तृतीय क्रमांकाचे पारितोषिक पटकाविले.
इचलकरंजीचे दशवतार बढे आणि कोल्हापूर जिल्ह्यातील उत्कर्ष पाटील, शरद पाटील या तिघांनी प्रत्येकी पाच हजार रुपयांचे अनुक्रमे उत्तेजनार्थ प्रथम, द्वितीय आणि तृतीय क्रमांकाचे पारितोषिक मिळविले. याशिवाय विशेष प्रयत्न म्हणून नवी मुंबईतील शुभजित मुखर्जी यांनी काढलेल्या छायाचित्रास तीन हजार रुपयांचे पारितोषिक मिळाले. पुण्यातील ‘देवदत्त फोटोग्राफी स्कूल’ यांच्या सहकार्याने विजेत्यांना एकूण रोख ५० हजारांची पारितोषिके दिली जाणार आहेत.
राज्याच्या विविध भागांतील सुमारे शंभरहून अधिक हौशी, अनुभवी आणि नवोदित छायाचित्रकारांनी एक हजार आठशेंहून अधिक छायाचित्रे पाठवून स्पर्धेत सहभाग नोंदविला. ‘सकाळ सोशल फाउंडेशन’ आयोजित स्पर्धेचे सलग दहावे वर्ष होते. सर्व छायाचित्रांचे परीक्षण फोटोग्राफर देवदत्त कशाळीकर आणि सहकारी यांच्यामार्फत करण्यात आले. वारीतील विविध प्रसंग, घटना, वारकऱ्यांच्या चेहऱ्यावरील हावभाव, वारीतील खेळ, रिंगण यांसारख्या विविध गोष्टी अचूक टिपण्याचा अनेक छायाचित्रकारांनी प्रयत्न केला आहे.

छायाचित्रांचे विनामूल्य प्रदर्शन
वारीवर आधारित स्पर्धेच्या माध्यमातून आलेल्या सर्व छायाचित्रांमधून निवडक छायाचित्रांचे प्रदर्शन पुण्यातील बालगंधर्व कलादालन येथे ७ ते ९ ऑगस्टदरम्यान तीन दिवस सकाळी १० ते सायंकाळी ६ या वेळेत ‘इंद्रायणी ते चंद्रभागा- एक चित्रप्रवास’ या नावाने सर्वांसाठी विनामूल्य आयोजित केले आहे. गुरुवारी (ता. ७) दुपारी १२ वाजता स्पर्धेतील विजेत्यांना बालगंधर्व कलादालन येथे पारितोषिके प्रदान करण्यात येणार आहेत.