शिवसेनेने मारली बाजी ; राष्ट्रवादीचाही धडाका, महाआघाडीत एकी नसल्याचे चित्र

देवरूख (रत्नागिरी) : शिवसेनेचे खासदार विनायक राऊत यांच्या तालुका दौऱ्यापाठोपाठ चिपळूण-संगमेश्‍वरचे राष्ट्रवादीचे आमदार शेखर निकम यांनीही काल या भागात दौरा केला. त्यामुळे राज्यात महाविकास आघाडी असली आणि हे दोन्ही पक्ष त्यात सहभागी असले तरीही दोन्ही पक्षनेते आपापल्या परीने आपापल्या पक्षांची ताकद वाढवताना दिसत आहेत. 

राज्यातील महाविकास आघाडी सरकारला एक वर्ष पूर्ण झाले. या आघाडीत शिवसेना, राष्ट्रवादी, काँग्रेस असे तीन भिन्न विचारधारेचे पक्ष केवळ भाजपला सत्तेपासून दूर ठेवण्यासाठी एकत्र आले आहेत. राज्यात या तीन पक्षांची आघाडी असली तरीही स्थानिक पातळीवर मात्र अद्यापतरी या पक्षांमध्ये एकी झाल्याचे चित्र नाही. गेल्या वर्षभरात सरकार स्थापन झाल्यानंतर कोरोनाचे मोठे संकट आले. या संकटातही हे तीन पक्ष आपापल्या ताकदीनुसार काम करताना दिसत होते. यानंतर हे संकट कमी होत असताना आणि देशभरात अनलॉक सुरू असतानाच आता बऱ्यापैकी विकासकामांना सुरवात झाली आहे.

हेही वाचा -  महाविकास आघाडीच्या एकजुटीचा विजय

शिवसेनेचे खासदार विनायक राऊत यांनी दोन दिवसांपूर्वी कोसुंब आणि ओझरेखुर्द जिल्हा परिषद गटाचा दौरा करून तब्बल १५ विकासकामांची भूमिपूजने, उद्‌घाटने केली. या दौऱ्यात शिवसेनेकडून चांगलेच शक्‍तिप्रदर्शन करण्यात आले. कोरोना काळात पक्षाला आलेली मरगळ झटकण्यात शिवसेनेला बऱ्यापैकी यश आले. यानंतर दुसऱ्याच दिवशी या मतदार संघाचे राष्ट्रवादीचे आमदार शेखर निकम यांनी कोसुंब गटात धडाकेबाज दौरा करत विविध कामांची चर्चा, पाहणी तसेच मंजूर कामांची भूमिपूजने केली. या दौऱ्यातही राष्ट्रवादीने शक्‍तिप्रदर्शन करत आपली ताकद दाखवून दिली.

बळ आजमावताना दिसत आहेत

एकाच आघाडीतील दोन पक्षांच्या प्रमुख नेत्यांचे एकाच गटात ते सुद्धा एकामागोमाग एका दिवशी होणारे दौरे चर्चेचा विषय बनले आहेत. राज्यात एकी असताना स्थानिक पातळीवर मात्र हे पक्ष आपापले बळ आजमावताना दिसत असून यातून आगामी पंचायत समिती निवडणुकांसाठी जादा जागांची मागणी करण्याची ही खेळी असल्याचे बोलले जात आहे.

हेही वाचा - नोकरीच्या आमिषाने अल्पवयीन तरुणीला वेश्‍या व्यवसायास भाग पाडून लैंगिक अत्याचार

संपादन - स्नेहल कदम