सावंतवाडी, वेंगुर्ले, मालवण पालिकांची प्रभाग रचना जाहीर

ओरोस : डिसेंबरमध्ये मुदत संपलेल्या जिल्ह्यातील मालवण, सावंतवाडी व वेंगुर्ले पालिकांच्या नव्याने केलेल्या प्रभागांची प्रारूप प्रभाग रचना आज जाहीर करण्यात आली. यावर हरकती असल्यास ता. १७ पर्यंत लेखी नोंदविण्याचे आवाहन निवडणूक विभागाने केले आहे. यामुळे जिल्ह्यातील तिन्ही पालिकांचे निवडणूक बिगुल लवकरच वाजण्याची शक्यता आहे.

तीनही पालिकांच्या निवडणुकीच्या अनुषंगाने प्रभाग सीमांची प्रसिद्धी, हरकती व सूचना मागवणे, सुनावणी घेणे कार्यक्रम जाहीर झाला आहे. त्या अनुषंगाने तिन्ही ठिकाणी प्रारूप प्रभाग रचना रहिवाशांच्या माहितीसाठी उपलब्ध आहेत. त्याशिवाय जिल्हाधिकारी कार्यालयाच्या sindhusurg.nic.in या संकेतस्थळावर रचना प्रसिद्ध केली आहे. रचनेवर हरकत वा सूचना असल्यास संबंधितांचे सकारण लेखी निवेदन गुरुवारी (ता.१७) दुपारी तीनपर्यंत संबंधित मुख्याधिकाऱ्यांच्या नावे पाठवावे. त्यानंतर आलेले अर्ज विचारात घेतले जाणार नाहीत, असे निवडणूक विभागाने जाहीर केले आहे.

या तिन्ही नगरपरिषदांच्या पंचवार्षिक मुदती डिसेंबर २०२१ मध्ये संपल्या आहेत. तेथे सध्या प्रशासक कारभार पाहत आहेत. या तिन्ही नगरपरिषदांची सदस्य संख्या १७ वरून १९ केली आहे. दोन सदस्य वाढल्याने प्रभागांची नवीन रचना करणे बंधनकारक होते; परंतु कोरोनामुळे ते मुदत संपण्यापूर्वी झाले नव्हते. कोरोनाचा प्रभाव कमी झाल्यावर निवडणूक आयोगाने प्रभाग रचना नव्याने करण्याचे आदेश दिले होते. त्यानुसार नवीन प्रभाग रचना झाली. त्याचा प्रारूप आराखडा आज जाहीर झाला. हरकतींवरील सुनावणी झाल्यानंतर अंतिम प्रभाग रचना जाहीर होणार आहे. त्यानंतर आरक्षण सोडत निघेल. ही प्रक्रिया पूर्ण झाल्यावर निवडणूक जाहीर केली जाणार आहे.