एमआयडीसीची मुख्यजलवाहिनी फुटून पाणी गळती

रसायनी (रायगड) : पाताळगंगा औद्योगिक क्षेत्रात बीग कोला कंपनीजवळ एमआयडीसीची कमकुवत झालेली मुख्यजलवाहिनी फुटून अधुन मधुन मोठी पाणी गळती होत होती. पाणी गळती रोखण्यासाठी एमआयडीसीने उपाय योजना करावी आशी मागणी कारखानदांर आणि नागरिकांनी केली होती. या मागणीच्या सकाळने बातम्या प्रसिद्ध केल्या आहे. दरम्यान  एमआयडीसीने जुनी जलवाहिनी काढुन नवीन जलवाहिनी टाकली आहे. पाणी गळती थांबली असल्याने कारखानदांर आणि नागरिकांनी समाधान व्यक्त केले आहे. 

औद्योगिक क्षेत्रातील एमआयडीसीच्या कैरे येथील जलशुध्दीकरण केंद्रातुन पाताळगंगा, अतिरिक्त पाताळगंगा औद्योगिक क्षेत्रातील कारखाने तसेच वडगाव, जांभिवली, कराडे खुर्द, चावणा आदि ग्रामपंचायतीच्या हद्दितील सुमारे पंधरा गावांना पाणी पुरवठा करण्यात येते आहे. मुख्य रस्त्याच्याकडेला बीग कोला कंपनी जवळ एमआयडीसीची कमकुवत झालेली मुख्य जलवाहिनी कित्येक महिन्यापासुन अधुन मधुन फुटुन मोठी पाणी गळती होत होती. गळतीतुन भरपूर पाण्याची नासाडी होत असल्याने कारखानदांर आणि नागरिक नाराजी व्यक्त करत होते. सकाळने या गळतीच्या बातम्या प्रसिद्ध केल्या. या बातम्यांची दखल एमआयडीसीने घेतली. जिर्ण झालेली जलवाहिनी काढुन त्याठिकाणी नवीन जलवाहिनी टाकली आहे. त्यामुळे रसायनी पाताळगंगा परीसरातील मोठी पाणी गळती एमआयडीसीने थांबली आहे. तसेच पाण्याचा दाब वाढला असल्याने कारखानदांर व नागरिकांना दिलासा मिळणार आहे. 

कमकुवत झालेली पाईपलाईन अधुन मधुन फुटून पाणी गळती होत होती. पाणी गळतीवर तात्पुर्ती उपाय योजना केली मात्र गळती थांबली नाही. म्हणुन सुमारे आठशे मीटर कमकुवत झालेली पाईपलाईन काढुन नवीन टाकली आहे असे एमआयडीसीच्या अभियंत्याने सांगितले.