अखेर नगरसेवकानेच तो खोका तोडण्याची केली तयारी

मुझफ्फर खान
Wednesday, 18 November 2020

प्रशासनाच्या कारवाईत अडथळा आणला म्हणून माजी नगरसेवकासह त्याच्या मुलावर गुन्हा दाखल करण्यात आला आहे. 

चिपळूण (रत्नागिरी) : अनधिकृत खोक्यावरील प्रशासनाच्या कारवाईवर नगराध्यक्षांनी नाराजी व्यक्त केली. तरीही प्रशासन आपल्या भूमिकेवर ठाम राहिल्यामुळे माजी नगरसेवकाने आपले बांधकाम स्वतःहून हटवण्याची तयारी केली आहे. प्रशासनाच्या कारवाईत अडथळा आणला म्हणून माजी नगरसेवकासह त्याच्या मुलावर गुन्हा दाखल करण्यात आला आहे. 

चिपळूण शहरातील शिवनदी लगत माजी नगरसेवक रमेश खळे यांनी अनधिकृत खोका उभारून तेथे चहा विक्रीचा व्यवसाय सुरू केला होता. शिवनदी लगत खळे यांचे वडापाव विक्रीचे दुकान होते. त्याठिकाणीच त्यांनी पत्र्याची पक्की शेड टाकून चहा विक्रीचा व्यवसाय सुरू केला. सोमवारी आमदार शेखर निकम, नगराध्यक्षा सुरेखा खेराडे आदींच्या हस्ते खळे यांच्या नवीन व्यवसायाचे उद्घाटन झाले. तत्पूर्वी खोक्याचे बांधकाम सुरू असताना प्रशासनाच्या कर्मचार्‍यांनी खळे यांना बांधकाम करू नका अशी तंबी दिली होती.

हेही वाचा - नेत्यांनी सत्तेसाठी लाज विकली, हिंदुत्व विकले, मग कार्यकर्त्यांनी दारू विकली तर कुठे बिघडले ? -

परंतू दिवाळीनिमित्त असलेल्या सुट्टीची संधी साधत त्यांनी बांधकाम केले आणि व्यवसायाला सुरवातही केली. त्यानंतर मंगळवारी पालिका सुरू झाल्यानंतर अतिक्रमण विरोधी पथक जेसीबी घेवून खळे यांचा खोका पाडण्यासाठी गेले. त्यानंतर खळे व त्यांचा मुलगा साहिल यांनी आत्महत्या करण्याचा इशारा देत पालिकेच्या कारवाईत अडथळा आणला. पोलिसांनी साहिलला ताब्यात घेतले होते. मात्र खळे खोक्यावर चढले होते. त्यामुळे त्यांना ताब्यात घेता आले नाही. त्यांनी पालिका आणि पोलिस यांना वेटीस धरण्याचा प्रयत्न केला परंतू पालिकेचा प्रशासन विभाग आपल्या निर्णयावर ठाम राहिला. 

खळे यांनी आपला खोका तुटू नये यासाठी वेगवेगळ्या स्तरावरून प्रयत्न केला. प्रशासनावर दबाव टाकण्याचा प्रयत्न केला. राजकीय अधिकार्‍यांनी मध्यस्ती करण्याचा प्रयत्न केला. परंतू खळे यांनी पालिकेच्या कारवाईला आव्हान दिल्यामुळे प्रशासन आपल्या भूमिकेवर ठाम राहिले. त्यानंतर खळे यांनी आपला खोका स्वतःहून तोडण्याची तयारी दर्शवली आहे.

हेही वाचा -  चोर समजून तरुणालाच केली बेदम मारहाण -

रमेश खळे यांनी ज्याठिकाणी पत्र्याचे पक्के बांधकाम केले होते. त्याच ठिकाणाहून महावितरणची 33 केव्हीची विद्युत वाहिनी जाते. वीजेचा खांबही त्याठिकाणी आहे. खोक्यात चहा आणि इतर पदार्थ बनविण्यासाठी खळे गॅसचा वापर करतात. जर तिथे एखादी घटना घडली तर त्याला जबाबदार कोण राहणार ? यापूर्वी ते हातगाडीवर वडापावचा व्यवसाय करत होते त्याकडे पालिकेने दुलर्क्ष केले. पालिकेची कारवाई टाळण्यासाठी कोणी आत्महत्या करण्याची धमकी दिली आणि त्याला प्रशासन घाबरले तर केवळ चिपळूणमध्ये नव्हे राज्यात ही सवय लागेल. त्यामुळे प्रशासनाला कठोर राहणे भाग झाले.

- प्रमोद ठसाळे, प्रशासकीय अधिकारी चिपळूण पालिका

 

संपादन - स्नेहल कदम 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: yesterday the on small tea shop one man attained suicide but now today he take decision shop remove from this area in ratnagiri