INDvsWI : रहाणेचा दिलदारपणा, बघा कोणाला केलं शतक अर्पण

अॅंटीगा : भारत आणि वेस्ट इंडिज यांच्यात झालेल्या पहिल्या कसोटी सामन्यात मधल्या फळीत उपकर्णधार अजिंक्‍य रहाणे याने शानदार शतक झळकावून आपल्या फॉर्मविषयी टिका करणाऱ्यांना चोख उत्तर दिले. त्याने हे शतक कठीण प्रसंगी त्याची साथ देणाऱ्यांना समर्पित केले आहे. 

''पहिल्या डावात माझी खेळी संघासाठी खूप महत्त्वाची होती. मी सध्या फॉर्मात नसल्याने माझ्यावर खूप टीका करण्यात येत होत्या मात्र, मी त्यांच्याकडे लक्ष देत नाही. दुसऱ्या डावात मी शतक केलं आणि याचं मला खूप समाधान आहे. माझ्या कठीण प्रसंगी ज्यांनी माझी साथ दिली, ज्यांनी माझ्यावर विश्वास दाखवला, पाठीशी उभे राहिले त्यांना हे शतक समर्पित करतो,'' अशा शब्दांत दिलदार रहाणेने आपले मत व्यक्त केले. 

रहाणेने हनुमा विहारीच्या साथीत भारताचे आव्हान भक्कम केले. कारकिर्दीतले दहावे शतक साजरे करताना त्याने विहारीच्या साथीत पाचव्या विकेटसाठी 135 धावांची भागीदारी केली. रहाणेने संयमाने फलंदाजी करताना कारकिर्दीमधील दहावे शतक साजरे केले.