भारताच्या लवलिना, हुसामुद्दीनचे पदक पक्के

अम्मान (जॉर्डन) : भारतीय खेळाडूंची आशियाई एलिट बॉक्सिंग अजिंक्यपद स्पर्धेतील उल्लेखनीय कामगिरी रविवारीही कायम राहिली. पुरुषांच्या गटात मोहम्मद हुसामुद्दीन याने उपांत्य फेरीत प्रवेश करून भारतांसाठी पदक पक्के केले. त्याआधी शनिवारी लवलिना बोर्गोहेन हिनेही महिला गटात अंतिम चारमध्ये धडक मारत पदक पक्के निश्‍चित केले होते.

दोन वेळेच्या राष्ट्रकुल स्पर्धेतील ब्राँझपदक विजेत्या हुसामुद्दीनने हेंगसेओक ली याचा ५७ किलो वजनी गटात ५-० असा सहज पराभव केला. हेंगसेओकने सुरुवातीपासूनच हुसामुद्दीनवर जोरदार ठोसे लगावत दबाव टाकण्यास सुरुवात केली होती; मात्र आपला अनुभव पणास लावून हुसामुद्दीनने पुनरागमन करत सामना ५-० असा कतर्फी जिंकला. हुसामुद्दीनचा उपांत्य फेरीचा सामना कझाकस्थानच्या सेरिक तेमिरझाशी १० नोव्हेंबर रोजी होणार आहे. पुरुषांच्या ५४ किलो वजनी गटाच्या दुसऱ्या उपांत्यपूर्व फेरीच्या सामन्यात महाराष्ट्राच्या अनंता चोपडेला किर्गिझस्तानच्या सेदेकमाटोव्ह सांझाईकडून ०-४ असे पराभूत व्हावे लागले.

महिला गटातही आगेकूच

भारतीय खेळाडूंनी महिला गटातही दमदार कामगिरी केली. अनिकुशिता बोरो हिने ५६ किलो वजनी गटात आणि लवलिना बोर्गोहेन हिने ७५ किलो वजनी गटात आशियाई अजिंक्यपद बॉक्सिंग स्पर्धेच्या उपांत्य फेरीत प्रवेश केला आहे. अनिकुशिताने जपानच्या त्सुबाटा अरिसा हिचा पराभव केला; तर बार्गोहेनने कझाकस्तानच्या व्हॅलेंटिना खल्झोवाचा ३-२ असा विभाजित निकालाने पराभव केला.

पुरुष गटात पाच खेळाडूंचा कस लागणार

भारतातर्फे (सोमवारी) नरेंदर ( +९२ किलो), नवीन कुमार (९२ किलो), लक्ष चहर (८० किलो), सुमित (७५ किलो) आणि सचिन (७१ किलो) आपापल्या गटात हे आपले नशीब आजमावणार आहेत. या खेळाडूंकडून पदकाच्या आशा आहेत. या आशियाई स्पर्धेत २७ देशांमधून २६७ बॉक्सर सहभागी झाले आहेत.