Bajrang Punia : अपात्रतेनंतरही पुनियाला मंत्रालयाकडून मदत

नवी दिल्ली : पॅरिस ऑलिंपिकसाठी अपात्र ठरल्यानंतरही बजरंग पुनिया याला केंद्रीय क्रीडा मंत्रालयाकडून आर्थिक मदत करण्यात आली आहे. तसेच त्याचे वैयक्तिक प्रशिक्षक यांचा करार वाढवण्याची त्याची मागणीही मान्य करण्यात आली आहे.

केंद्रीय क्रीडा मंत्रालयाकडून याप्रसंगी सांगण्यात आले, की बजरंग पुनियाचे प्रशिक्षक काझी मुस्तफा यांच्यासोबतचा करार २४ मे २०२४ पर्यंत वाढवण्याला परवानगी देण्यात आली आहे. दरम्यान, बजरंग पुनिया याने ब्रिजभूषण शरण सिंह यांच्याविरोधात आक्रमक भूमिका घेतली होती.

त्याच्यासह आणखी काही कुस्तीपटूंनी भारतीय कुस्ती संघटनेविरोधात आंदोलनही केले. त्यानंतर काही दिवसांपूर्वीच झालेल्या आशियाई व ऑलिंपिक पात्रता फेरीत तो ६५ किलो वजनी गटात अंतिम चार फेरीपर्यंत पोहोचला नाही.

त्यामुळे पॅरिस ऑलिंपिकमध्ये प्रवेश करण्याच्या त्याच्या आशांना सुरुंग लागला. बजरंग पुनियासह टेबल टेनिस खेळाडू श्रीजा अकुला, मानस ठक्कर, पयास जैन, ज्युडो खेळाडू तुलिका मान यांच्या मागण्याही मान्य करण्यात आल्या आहेत.