Champions League : मेस्सी-नेमार-एम्बापे खेळूनही पीएसजीची बरोबरी

जीनेव्हा : लिओनेल मेस्सी, नेमार आणि एम्बाबे असे सुपरस्टार एकत्रित खेळण्याचा योग जुळून आला, परंतु चॅम्पियन्स लीगच्या लढतीत पीएसजीला बेल्जियमचा फारसा प्रसिद्ध नसलेल्या ब्रुग या क्लबविरुद्ध 1-1 अशा बरोबरीवर समाधान मानावे लागले.मेस्सी-नेमार-एम्बापे असे निष्णांत स्ट्रायकर असताना पीएसजीचा गोल अँदर हेरेराने केला. त्यामुळे त्यांच्यावरची पराभवाची नामुष्की तरी टळली.

संपूर्ण फुटबॉल विश्व ही त्रयी एकत्रित कसा खेळ करते याची आतुरतेने वाट पाहत होते, पण मेस्सीचा एक फटका बारला लागून बाहेर गेला, त्यानंतर त्याला यलो कार्डही दाखवण्यात आले. एम्बापेचा डावा गुडघा दुखावल्यामुळे त्याला सामना अर्धवट सोडून बाहेर जावे लागले. एकूणच या तिघांची भट्टी सलामीच्या सामन्यात तरी जमली नाही.

चॅम्पियन्स लीगच्या इतर सामन्यात सेबास्टिन हॅलेरने अजेक्सच्या 5-1 अशा विजयात चार गोल केले. त्यांनी स्पोर्टिंग लिसबनला हरवले, तर मँचेस्टर सिटीने लेपिझिंगचा 6-3 असा पराभव केला. लिव्हरपूलने एसी मिलानवर 3-2 अशी मात केली. एसी मिलान हा इटलीतील क्लब सात मोसमानंतर चॅम्पियन्स लीगसाठी पात्र ठरला आहे.