चेन्नई : आव्हानवीरांची बुद्धिबळ स्पर्धा जिंकून जगज्जेतेपदाच्या लढतीसाठी दावेदार ठरलेल्या डी. गुकेश याचे गुरुवारी मायदेशात अभूतपूर्व जल्लोषात स्वागत करण्यात आले. भारताच्या १७ वर्षीय या पठ्ठ्याने याप्रसंगी महान खेळाडू विश्वनाथन आनंद आपले प्रेरणास्थान असल्याचे उद्गार काढले. तो म्हणाला, ‘‘आनंद सर नसते तर मी आता जे मिळवले आहे, त्याच्या जवळपासही पोहचू शकलो नसतो.’’
डी. गुकेश याने भारतात पाऊल ठेवल्यानंतर पार पडलेल्या पत्रकार परिषदेत आपली मते व्यक्त केली. या वेळी तो म्हणाला, ‘‘आनंद सर माझे प्रेरणास्थान आहेत. त्यांच्या अकादमीत प्रशिक्षण घेतल्याचा मला फायदा झाला. माझ्या कारकीर्दीत या अकादमीकडून प्रमुख भूमिका बजावण्यात आली. आनंद सरांमुळेच मला इथपर्यंत मजल मारता आली आहे.’’
डिंग लिरेनविरुद्धची जगज्जेतेपदाची लढत ही अत्यंत मोठ्या स्तरावरील असणार आहे. मी या लढतीची तयारी कशाप्रकारे करतो हेच प्रमुख आव्हान असणार आहे. योग्य मानसिक क्षमतेने मला जगज्जेतेपदाच्या लढतीत उतरावे लागणार आहे.
-डी. गुकेश, आव्हानवीरांच्या बुद्धिबळ स्पर्धेतील विजेता
डी. गुकेश पुढे म्हणाला, ‘‘जगज्जेतेपदाच्या लढतीसाठी माझ्याकडून मोठ्या अपेक्षा आहेत. सर्व काही पणाला लागले आहे. आव्हानवीरांच्या स्पर्धेत ज्या योजनांसह खेळलो, त्याच योजना अमलात आणण्याचा प्रयत्न करीन. माझा स्वत:वर विश्वास आहे. माझ्या योजना यशस्वी होतील, अशी आशा करतो.’’
डी. गुकेश याचे मायदेशात जल्लोषात स्वागत करण्यात आले. चेन्नई येथील विमानतळावर गुकेश येण्याआधी एक तास वेलाम्मल विद्यालयातील हजारो मुले उपस्थित होती. गुकेश हे पाहून भारावून गेला. तो म्हणाला, ‘‘विमानतळावर शाळकरी मुलांचा उत्साह पाहून माझा विजय देशासाठी किती महत्त्वाचा होता हे समजले. माझ्यासाठी हे खास आहे.’’
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.