CWG 2022 Diamond League : राष्ट्रकुल रौप्य विजेता श्रीशंकर सहावा

मोनॅको : डायमंड लीग ॲथलेटिक्स स्पर्धेत प्रथमच सहभागी झालेल्या मुरली श्रीशंकरने लांब उडीत सहावे स्थान मिळवताना तीन गुणांची कमाई केली. राष्ट्रकुल क्रीडा स्पर्धेतील रौप्यपदक विजेत्या श्रीशंकरने मोनॅको येथील स्पर्धेत ही कामगिरी केली. त्याला आठ मीटरचा टप्पा पार करता आला नसला तरी १० दिग्गज खेळाडूंचा समावेश असताना त्याने सहावे स्थान मिळवून डायमंड लीगमध्ये आपले खाते उघडले.

अमेरिकेत झालेल्या जागतिक स्पर्धेत सातवे स्थान मिळविल्यानंतर केरळमधील पलक्कडच्या असलेल्या श्रीशंकरने नुकत्याच बर्मिंगहॅम येथे झालेल्या राष्ट्रकुल क्रीडा स्पर्धेत ८.०८ मीटर अंतरावर उडी मारून रौप्यपदक जिंकले होते. जागतिक स्पर्धेच्या पात्रता फेरीतही त्याने ८ मीटरवर उडी मारली होती; मात्र मोनॅकोत त्याला ८ मीटरचा जादूई आकडा गाठता आला नाही. पाचव्या प्रयत्नात ७.९४ मीटर अंतरावर उडी मारली. ही त्याची सर्वोत्तम कामगिरी ठरली. त्याची सुरुवात आश्वासक नव्हती. ७.६१ मीटर अंतरच तो गाठू शकला होता. तो ८ मीटरपेक्षा अधिक उडी मारू शकला असता, तर त्याला चौथे स्थान मिळू शकले असते.

यात जागतिक स्पर्धेत चौथे स्थान मिळवणाऱ्या क्युबाच्या मॅसो मायकेलने ८.३५ मीटरची कामगिरी करताना प्रथम स्थान मिळवले. जागतिक रौप्यपदक विजेत्या ग्रीसच्या मिल्टीडिअस टेंटाग्लो याला ८.३१ मीटरसह दुसरे स्थान मिळाले. सध्या हा डायमंड लीगमध्ये २४ गुणांसह आघाडीवर आहे. श्रीशंकर ३ गुणांसह अन्य दोन खेळाडूंसोबत संयुक्तपणे नवव्या स्थानावर आहे. ८.३६ मीटर ही श्रीशंकरची सर्वोत्तम कामगिरी आहे. पुढील डायमंड लीग स्पर्धा २६ ऑगस्ट रोजी लुसान (स्वित्झर्लंड) येथे होणार आहे.