आफ्रिकेची 'स्टेन'गन कायमची थंडावली... निवृत्तीची केली घोषणा!

महान फलंदाजांची दांडी गुल करणाऱ्या डेल स्टेनचा क्रिकेटला अलविदा

Dale Steyn Retirement: दक्षिण आफ्रिकेचा वेगवान गोलंदाज डेल स्टेन याने आज सर्व प्रकारच्या क्रिकेट स्पर्धांमधून निवृत्तीची घोषणा केली. आफ्रिकेसाठी १७ वर्षे धडाडणारी स्टेन गन अखेर आज क्रिकेटच्या मैदानातून कायमची थंडावली. आपल्या कारकिर्दीत डेल स्टेनने अनेक महान फलंदाजांचा सामना केला. त्याशिवाय, अनेक फलंदाजांचे त्रिफळी उडवून त्यांच्या मनात आपल्या वेगाची दहशत निर्माण केली. ३८ वर्षीय डेल स्टेनने १७ वर्षांच्या दैदिप्यमान कारकिर्दीनंतर आज ट्वीटरवरून निवृत्तीची घोषणा केली. ९३ कसोटी, १२५ वन डे आणि ४७ टी२० सामन्यांमध्ये दक्षिण आफ्रिकेचे प्रतिनिधित्व केल्यानंतर त्याने क्रिकेट कारकिर्दीला रामराम ठोकला. कसोटी क्रिकेटमधून तो २०१९ मध्येच निवृत्त झाला होता.

"आज मी अधिकृतरित्या माझ्या सर्वात आवडत्या गोष्टीला अलविदा म्हणतोय. क्रिकेटमधून निवृत्त होण्याचा निर्णय वेदनादायी आहे पण मला क्रिकेटने जे काही दिलं त्यासाठी मी क्रिकेटचा आभारी आहे. माझ्या कुटुंबीयांपासून ते संघातील सर्व सहकाऱ्यांपर्यंत आणि पत्रकारांपासून ते चाहत्यांपर्यंत सर्वांचाच मी आभारी आहे. गेल्या वर्षीपेक्षा हे वर्ष कोरोनाच्या दृष्टीने सुसह्य आहे. साऱ्यांनी काळजी घ्या", अशा शब्दात त्याने आपल्या निवृत्तीच्या वेळच्या भावना व्यक्त केल्या. गेली २० वर्षे सराव, क्रिकेट सामने, प्रवास, हार, जीत, सोललेले पाय, जेट लॅग, आनंद, बंधूभाव आणि त्यासारख्या अनेक गोष्टी पाहायला मिळाल्या. आठवणी खूप साऱ्या आहेत. आभार मानण्यासाठीही खूप लोक आहेत. या साऱ्यांचेच आभार, असंही स्टेनने नमूद केले.