इंग्लंडने स्वत:च्या पायावर मारुन घेतली कुऱ्हाड; पाहा पुरावा (VIDEO)

लॉर्ड्सच्या मैदानावर पहिला दिवस सोडला तर दुसरा, तिसरा आणि चौथा दिवस इंग्लंडने गाजवला. चौथ्या दिवसाअखेर भारतीय संघ ज्या स्थितीत होता त्यावेळी विजयाची स्वप्ने सोड पण सामना अनिर्णित राखण्यासाठी भारताने काय करायला हवे, अशी परिस्थिती होती. पुजारा आणि अजिंक्य रहाणेनं चौथ्या दिवशी केलेल्या शतकी भागीदारीमुळे भारतीय संघ अडचणीतून बाहेर आला खरा. पण पाचव्या दिवशी भारतीय संघाला कोण तारणार? हा मोठा प्रश्न टीम इंडियासमोर होता. सगळ्यांच्या नजरा होत्या त्या रिषभ पंतवर. पण तो बाद झाल्यावर इंग्लंडने लॉर्ड्सचे मैदान मारल्याची स्वप्ने बघायलाही सुरुवात केली असेल.

इंग्लंडचा संघ मजबूत स्थितीत असल्यामुळे त्यांनी हे स्वप्न पाहणं सहाजिकच होते. पण त्यांनी एक मोठी चूक केली. ती चूक होती भारतीय लोअर ऑर्डरला शुल्लक समजण्याची. क्रिकेटच्या पंढरीत इंग्लंडचे खेळाडू आणि भारतीय खेळाडू यांच्यात शाब्दिक खेळ रंगल्याचे चित्रही क्रिकेट चाहत्यांनी अनुभवले. इंग्लंडच्या दुसऱ्या डावात इंग्लंडचा अनुभवी जलदगती गोलंदाजाला बुमराहने बाउन्सर आणि यॉर्करचा मारा करुन हैराण करुन सोडल्याचे पाहायला मिळालं. ही गोष्ट लक्षात ठेवून इंग्लंडच्या गोलंदाजांनी भारतीय तळाच्या फलंदाजांना जशास तसे उत्तर देण्याचा प्रयत्न केला.

जोस बटलर आणि मार्क वूडने जसप्रित बुमराह बॅटिंग करत असताना केलेली शाब्दिक वादावादीशिवाय अँडरसन आणि कंपनी बुमराहची विकेट घेण्याचे सोडून त्याने मारलेल्या बाउन्सर आणि यॉर्करची परत फेड करण्याच्या बदल्याच्या भावनेतून खेळताना दिसले. परिणामी त्यांची लाइन-लेंथ बिघडली. याचा फायदा भारतीय संघाला झाला. शमी आणि बुमराहने नवव्या विकेटसाठी विक्रमी भागीदारी करत सामन्याचे चित्र पलटले. भारतीय संघाच्या 7 गड्यांना तंबूत पाठवल्यानंतर जो संघ मालिकेत आघाडीची स्वप्न बघत होता त्या संघावर सामना कसा वाचववा हा पेच निर्माण झाला. तळाच्या फलंदाजांना किरकोळ समजून आणि बदल्याच्या भावनेतून भरकटलेल्या रणनितीमुळे इंग्लंडने स्वत:च्या पायावार कुऱ्हाड मारण्याचा प्रकारच दिसून आला.

भारत आणि इंग्लंड यांच्यातील कसोटी सामन्यादरम्यान दोन्ही संघातील खेळाडूंमध्ये भरमैदानात रंगलेल्या शाब्दिक वादावादीचे काही फोटो आणि व्हिडिओ सोशल मीडियावर व्हायरल हाताना दिसते. इंग्लंडचा जलदगती गोलंदाज अँडरसन, मार्क वूड आणि बटलर विरुद्ध बुमराह असे काहीचे चित्र पाचव्या आणि अखेरच्या दिवसाच्या खेळात पाहायला मिळाले. पंचांच्या मध्यस्थीनंतर पुन्हा ते आपापली जबाबदारी पार पाडताना दिसले.