Paris Olympics Rowing : बलराज पन्वरकडून ऑलिंपिक कोटा ; रोईंग खेळात पात्रता मिळवणारा पहिलाच भारतीय

नवी दिल्ली : बलराज पन्वर याने रविवारी भारताला रोईंग या खेळामध्ये पॅरिस ऑलिंपिकचा कोटा मिळवून दिला. दक्षिण कोरिया येथील चुंगजू येथे जागतिक, आशियाई ऑलिंपिक, पॅरालिंपिक पात्रता फेरी सुरू असून बजरंग याने पुरुषांच्या सिंगल स्कल प्रकारात भारतासाठी संस्मरणीय कामगिरी केली. त्याने तिसरा क्रमांक मिळवला.

२५ वर्षीय बलराज याचे चीन येथे पार पडलेल्या आशियाई क्रीडा स्पर्धेमध्ये थोडक्यासाठी ब्राँझपदक हुकले होते. यंदा ऑलिंपिक पात्रता फेरीत त्याने २००० मीटर शर्यत ७.०१.२७ अशा वेळेसह पूर्ण करताना ऑलिंपिक कोटाही मिळवला. या शर्यतीत अव्वल पाच क्रमांकामधील खेळाडूंना ऑलिंपिक कोटा मिळणार होता. भारताच्या खेळाडूने तिसरा क्रमांक पटकावत आपले ध्येय पूर्ण केले.

दरम्यान, पॅरा ऑलिंपिक पात्रता फेरीतील मिश्र डबल स्कल प्रकारात नारायण के. व अनिता या भारतीय जोडीने पहिल्या स्थानावर झेप घेतली. दोघांच्या शानदार कामगिरीच्या जोरावर भारताला पॅरिस पॅरालिंपिकचा कोटाही मिळाला.

उज्ज्वल, अरविंदचे अपयश

पुरुषांच्या लाईटवेट डबल स्कल्समध्ये भारतीय खेळाडूंना अपयश आले. उज्ज्वलकुमार व अरविंद सिंग या भारतीयांनी या शर्यतीत तिसऱ्या स्थानावर समाधान मानावे लागले. या शर्यतीत पहिल्या दोन क्रमांकावर असलेल्या खेळाडूंना पॅरिस ऑलिंपिकचा कोटा मिळणार होता. टोकियो ऑलिंपिकमध्ये भारतीय खेळाडू या प्रकारात पात्र ठरले होते.

कझाकस्तानच्या खेळाडूला सुवर्ण

पुरुषांच्या सिंगल स्कल प्रकारात बलराज पन्वर याने तिसरा क्रमांक पटकावला. अर्थातच त्याने ब्राँझपदक जिंकले. याच प्रकारात कझाकस्तानच्या व्लॅडीस्लाव याकोव्लेव याने ६.५९.४६ अशा वेळेसह शर्यत पूर्ण करीत सुवर्णपदकाला गवसणी घातली. तसेच इंडोनेशियाच्या मेमो मेमो याने रौप्यपदक आपल्या नावावर केले.