Harmanpreet Kaur : ऑस्ट्रेलियाविरूद्धच्या मालिकेत व्हाईट वॉश अन् हरमनच्या नावावर झाला अप्रिय विक्रम

Harmanpreet Kaur : भारतीय महिला क्रिकेट संघासाठी आजचा दिवस वाईट ठरला. ऑस्ट्रेलियाविरूद्धच्या तीन वनडे सामन्यांच्या मालिकेतील शेवटचा तिसरा सामना भारताने 190 धावांनी गमावला. भारताला या मालिकेत एकही सामना जिंकता आलेला नाही. दरम्यान, भारताची कर्णधार हरमनप्रीत कौरच्या नावावर एक अप्रिय रेकॉर्ड झाला आहे.

हरमनप्रीत कौरने या मालिकेत केलेल्या कामगिरीबद्दल बोलायचं झालं तर कर्णधाराला पहिल्या सामन्यात फक्त 9 धावा करता आल्या. त्यानंतर दुसऱ्या वनडे सामन्यात हरमनप्रीत फक्त 5 धावा करून पॅव्हेलियनमध्ये परतली. दुसऱ्या सामन्यात भारताचा फक्त 3 धावांनी पराभव झाला. तिसऱ्या सामन्यात हरमनला तर 10 चेंडूत फक्त 3 धावाच करता आल्या.

अशा प्रकारे हरमनने तीन वनडे सामन्यांच्या मालिकेत फक्त 17 धावा केल्या. ती भारताकडून तीन वनडे सामन्यांच्या मालिकेत सर्वात कमी धावा करणारी कर्णधार झाली आहे. तिने शिखर धवन आणि मिताली राजलाही याबाबतीत मागं टाकलं.

• हरमनप्रीत कौर 2023 - ऑस्ट्रेलियाविरूद्धची वनडे मालिका - 17 धावा

• पुर्णिमा राऊ 1995 - इंग्लंडविरूद्धच्या मालिकेत 24 धावा

• मिताली राज 2006 - ऑस्ट्रेलियाविरूद्धच्या मालिकेत 25 धावा

• शिखर धवन 2022 - दक्षिण आफ्रिकेविरूद्धच्या मालिकेत 25 धावा

हरमन काय म्हणाली?

सामन्यानंतर हरमनप्रीत म्हणाली की, 'मला वाटतं की वनडे मालिका आमच्यासाठी चांगली गेली नाही. काही खेळाडूंनी चांगली कामगिरी केली. काही खेळाडूंना आपल्या कामगिरीत कशी सुधारणा करता येईल याचा विचार करावा लागेल. आम्ही कसोटी खेळत होतो त्यावेळी आमच्याकडे विचार करण्यास वेळ होता. मात्र मर्यादित षटकांच्या सामन्यात तुम्हाला असा विचार करण्यास वेळ मिळत नाही.'

(Sports Latest News)